ERROR成員193（郭嘉駿）早前疑因在澳門演出跨年騷時，不滿全晚僅唱兩首半歌未有solo環節，其後在社交網「爆seed」指經理人阿濟發言不可信，更透露即將有新經理人，爆出ERROR內訌。193日前迎來36歲生日，歌迷會「193Club」於新蒲崗大搞生日派對，席間193感性爆喊，承認性格任性、衝動，傷害了愛錫他和一直在公司幫他的人。文、圖：娛樂組
歌迷會特意安排了193的偶像少爺占擔任生日會司儀，少爺占應景送書籍《剛剛好的任性》給193作生日禮物，193坦言在學習中，承認有時過分了，「我係一個一係就0，一係就100，任性太大。」他透露日前和隊友阿Dee相聚，對方總會提醒「唔好太大，收少少」，但自己仍未能控制到。他續承認自己言論過火，「我真係太任性，有時會帶嚟好多唔好嘅後果，以前會同自己講，後果嚟我承受到，然後我發覺原來唔係，如果你想所有人都開心，你要hold back，唔能夠100%任性。」
自爆現已無欲無求
席間，193眼見歌迷無限量的支持，一時感觸情緒爆發大喊，他透露最近看很多佛教哲學，已無欲無求，「只要放低執念，其實所有嘢都冇所謂，最緊要開心。」他亦主動提到早前爆seed發文一事：「前排同公司有啲不愉快，喺社交平台到有啲小事，自己衝動上網講咗啲嘢，甚至見到嗰位男性經理人（阿濟）講啲嘢，我覺得佢唔係講得太好，我就講咗啲嘢。我諗返，我可以私底下同佢講，唔應該擺上網講，令到我有啲覺悟。我唔理出面啲人諗咩，我淨係諗我話嗰啲人，佢哋會唔開心，我唔想佢哋唔開心。」未平伏情緒的193拭淚坦言想向被他傷害的人道歉，但自己怕羞、怕尷尬而仍未道歉，「要鼓起勇氣說出來，因怕冇機會講，變成永久心結。」
