早晨茶記，經常有的士司機扮演時事評論員，間中相當有料到，亦都幾搞笑。
肥司機：「矮佬，請問你，冇邏輯思維者，可否做高官制訂法例呢？」
矮司機：「點會呀？叫得做高官，起碼十幾萬元月薪起跳，隨時三、四十萬元一個月，點可能冇邏輯思維呀？又唔見你同我有得做？」
肥司機：「咪係，簡單，你有冇發覺即將生效嘅公共巴士及小巴安全帶修例，毫無邏輯性，睇落好荒謬呢？點解啲高官咁都諗得出嘅呢？」
矮司機：「我冇你咁醒，願聞其詳！」
肥司機：「第一，私家車司機唔扣安全帶，定額罰款幾嚿水，但公共巴士小巴司機乘客唔扣安全帶，嘩嘩嘩，多十幾倍罰款，最高去到五千元兼可能要坐監三個月。矮佬，你識唔識運輸署高官及寫法例班大帝，請佢地出嚟向市民解釋一下邏輯何在啦！」
矮司機：「係喎，肥佬。仲有呀，雙層巴士下層分分鐘企幾十名乘客，企，一定危險過坐啦，點解佢哋又唔使扣安全帶呢？呢吓有啲摸不著頭腦噃，奇奇怪怪。」
講講吓，已七點九，兩丁友開工去也。
跟住半小時，嘩嘩，人潮湧入，客量比平時多兩倍。點解？簡單，呢間茶記平日三十六元至四十一元的套餐，減到二十九元。
對不少熟客來講，係平幾蚊，但帶來頗大「災害」。首先，昔日寧靜環境冇晒，附近茶記任何型式的生客，全部湧到，搞到逼逼夾，冇晒悠閒氣氛。
肉眼所見，客量最少多兩倍，但樓面及水吧員工呢？一個都冇多。於是，人人做到踢晒腳，搞到落錯單出錯餐，兼且先後次序大混亂，早來的客見遲來的竟然「先上岸」，當然呱呱嘈，投訴聲不絕，服務員又做到周身火。
認真大鬼鑊，茶記老闆，麻煩你，加返價啦。