曾智華
打工江湖中，高層工種極多，有啲角色一做就一世，離職也不能離開角色，例如負責機密工作的政府人員。
一般來說，政府高層不可離職後亂說話，乜都應該吞咗佢就算。
但商業世界則未必如此，工作崗位不同，效力機構不同，說話也可以不同，當然要看個人風格的。
TVB總經理曾志偉「光榮辭職」，卸下五年重重的擔子，真真一身鬆晒，開始可以回復正常的志偉本色，噏得就盡量噏。
從佢口中，你可知道TVB老總個位係幾苦，尤其對佢呢種大情大性人物，簡直要被逼變另一個人。
圈內人皆知，志偉最愛搞爛Gag，乜都玩一餐，但做咗高層，弊！因身份代表機構，點可以講嘢無句真？例如晨早想辭職，就明明想都答記者：「冇呀，做得好開心。」（但原來辭職五次！）
明明喜歡唔守時做冇尾飛陀，竟逼自己朝朝八點在會議室，嚴嚴肅肅主持會議。明明TVB前途好多艱難，卻要講到一片光明，前景燦爛。明明做到殘晒，仍話自己充滿活力，熱愛工作。明明冇興趣做行政人員，但就講到喜歡嘗新，勇於接受挑戰。
不過，話說回來，所有老友見佢的個性竟可以頂足五年，無不稱奇。坦白話你知，小弟私下也曾與圈內友好開盤，打賭志偉呢個TVB高層位，可以做幾耐。結果，九成人跌眼鏡，輸餐飯。
說來，志偉上任時，的確胸懷大志意念多多，曾帶同王祖藍與小弟晚飯做「腦震盪」，摩拳擦掌大展拳腳。之但係，一如佢講，無記乃一艘大郵輪（冇講山頭林立人事複雜），難以想話轉身就轉身。如今佢終於甩難，重獲自由喇，恭喜晒，因可以不再扮「TVB老總」揞住個心講嘢，舒服晒！
