馬圈永遠有新聞，至於是否八卦，則見仁見智。最新一宗，當然是元旦前跑足一百零九場仍然沒法開齋的騎師潘大衛，突然被忠告要「入屋叫人，入廟拜神」，走咗去大嶼山寶蓮寺拜神，祈求打破三個月仍零雞蛋的悶局。
結果，元旦大賽日焦點，並非「軟硬鞭」或邊個做練馬師王，而竟然是包尾大幡騎師有冇神庇佑？跑馬跑到咁，你話是否好古怪？
潘包尾再落筆打三更，第一場「龍又生」繼續「冇影行動」，跑第八，只見少少近勢。
等呀等，又等到第六場，馬名非常掂，名「連連好運」，但馬迷擺明唔多信佢好運或有神庇佑，巨冷，獨贏賠率八十倍！
結果當然又得個桔。
好嘞，第七場嘞，個馬名真係勁——「銀火箭」，但一睇電算機，已知其實是「銀樣蠟槍頭」！點解？因獨贏一百零八倍呀！果然，大衛仔好似唔識騎，隻馬則好似唔識跑咁款，輸十二個幾馬位，簡直冇眼睇。
神呀神呀，乜呢丁大衛仔專誠去拜你，你睇都唔睇佢㗎？出四隻，已經瓜直三隻喇。唯一希望第九場「三軍勇將」，畀吓面啦。睇飛，有少少機會，閘前獨贏十四倍。
結果又如何？開呀，「三軍勇將」排十檔，一出閘，大衛仔好似見習生般手忙腳亂，入直路只識尾隨，瓜埋最後一隻。
天助自助者，你冇料到，神都唔騷你，走啦！
明天沙田有場三級賽，跑一千米。眾所周知，一千米是要專項馬跑，不擅此程馬的，極難贏，而排著第一、二、三檔，也幾乎可以搣飛。
呢場大熱必為「顏色之皇」，上次按韁拋離贏，被重加九分，高班一千米賽事唔多，食得就食，二重彩複式膽，腳拖「氣勢」、「美麗第一」、「英雄豪傑」及「水晶酒杯」可也。
