由冬至到聖誕再到新年，一直打落到農曆新年團年及開年，有N加N咁多餐要食。舊同學、舊同事、回歸老友及親戚等，大家上晒年紀，當然想把握機會與喜歡的人多相聚。點解？心照啦。

呢類聚餐，唔通食串燒壽司Pizza之類咩？當然是懷舊菜，尤其廣東菜。

凡有約，幾乎一致要求——碌Sir決定去邊！次次都有十至十六人，首先要搵地方，唔好食會畀人窒到飛起。然後要有房，因小弟老友多愛口沫橫飛爆料（講緊我自己？），無房唔掂，所以，必須早早訂位。

上周又一餐，兩個月前決定去「昌哥粵菜館」，因有回流老友指定要食「雞子戈渣」。

昌哥出身陸羽茶室，乃香港粵菜大師，任何順德菜，越舊越拿手。總之陸羽出品，佢全部掂之外，客人有要求，佢又會做。

呢餐小弟指定要兩味經已冇乜酒家願做的麻煩菜——八寶鴨及煎釀鯪魚。

麻煩，因工夫多到暈，先要起肉留皮，再釀入大量調校後的食材一同炮製，填滿鴨肚及魚肚後，再經細緻烹製工夫方可完成。

老友，鴨及鯪魚點賣得起價錢？求利酒家，當然寧願「逼」客人整返條野生斑，少少工序已可收一千幾百元。做八寶鴨、釀鯪魚？搞到成身汗做半日，只能賣幾百元，點划算？

故此，市場因素令兩種傳統美食式微。

昌哥唔話得，小弟作出要求，乜都肯做。結果精心炮製出一條我從未試過如此高水準的煎釀鯪魚。

「昌哥，點解可以正成咁？」

「碌Sir，因食正季節，冬天臘味尤其美味，混入鯪魚肉內的金銀腸放出油脂，香噴噴，再慢慢煎，效果就會如此㗎啦。」

地址：中環德己立街2號業豐大廈2樓

電話：2361 8933