曾智華
聖誕期間，百多萬人離港，玩到殘玩到?，上周日大軍湧返，呢呢，此時正是我開始部署出遊良機。近年發覺，做逆流大叔開心到震，乜都便宜外，處處有位，處處寧靜，舒適優游。
周一早上施施然到中港城，搭十點船上中山，空位甚多，個個客人可不按號任坐，個多小時已抵達。如今的中山港碼頭，靚到似先進機場，可能有部署日後做大灣區郵輪碼頭中心。
一團人全部自己友，柴娃娃無拘無束，坐最新旅遊巴直奔順德，午餐鎖定傳統老店「????館」。此乃如今大灣區火紅飲食集團「豬肉婆」的發源店，一切保留舊日風貌。
地膽老友「班長和」帶隊，真的冇得輸，早早寫好菜，要求不時不食。
到順德，當然河鮮不可少，未上主菜，先來一大煲胡椒豬肚湯。
湯渣山仔咁高，哇，陣容鼎盛，大量豬肚，另外多塊重磅豬骨，加瘦肉及白果。煲湯首重料足，呢煲精品入口已覺正到彈起，一碗之後，立即寬衣，全身發滾，唔該加碼。
順德有不少鹹淡水交界水域，有頗多肉質彈牙的野生鱔，其鮮美程度絕非養飼的可比，好，又來大大碟香煎爽鱔。「食家逵」??完一件，立即豎起手指公：「碌Sir，真真冇得頂，精彩呀！」
以上兩味堅正，但以小弟衡量，仍未夠另一味煎焗大魚面珠墩驚喜。一條大魚只有兩邊滑滑的面珠墩，一?人十二位，即要六條，珍貴也。廚師本領高，將面珠墩先上薄粉，再慢火煎焗，香噴噴，卜卜脆，面珠肉的魚雲滑嘟嘟，小弟從未試過大魚頭咁食，頂級正斗也。
死火，今程食七餐，此乃第一餐咋。
地址：廣東省佛山市順德區大良街道祥興南路11號
電話：0757-22610717
