曾智華

上周聖誕日，本報頭條為《郵輪碼頭新租約定KPI，營運商不達標須賠款》。

我睇到，第一反應——吓，咁都得？

為何有此反應？

由零開始，小弟已經在電台節目及報章專欄大聲疾呼⋯⋯政府切勿將郵輪碼頭的設計、興建及營運攬上身，因必定「蝕死未天光」！

我冇水晶球，但身為公務員幾十年，加上曾修讀公共行政碩士課程，故此，百分百知道甚麼應由政府做，甚麼應交回市場做。

其實再早十年，也曾同樣大聲疾呼——西九文化區，絕不應由政府做，蝕硬！

好嘅唔靈醜嘅靈，如今兩座大白象，皆蝕到攤攤腰，唔知點翻身。

點解文化區及郵輪碼頭不應政府上身？簡單，因兩者政府都想其自負盈虧（當然最好有錢賺兼有盈餘）。

不過，政府的繁複條例，公務員的價值觀及行事作風，大家冇可能唔知，不少是：一、做又三十六，唔做又三十六；二、不求有功，但求無過，最怕被罵「官商勾結」，被人走去報廉記；三、絕不會Think Out Of The Box，因一旦Think錯，衰咗邊個負責？反之，因循跟足章則，上司話乜照做，咁就安全晒；四、公務員從來唔識搵錢，因冇咁需要，亦唔鼓勵。

以上四大既定文化加埋，你叫公務員將設計、興建及營運攬上身？成功就扑我個頭！這點，其實人人都可預測到。

好嘞，啟德郵輪碼頭果然搞到一鑊泡，唔知點收科，蝕咗十二年，終決定交畀市場做。

本來相當正路，但睇睇政府訂的KPI，小弟立時感覺——你做唔到，竟要求別人做得到，有點怪怪的。

計我話，政府應放晒手畀中標者做，然後坐享分成。賺得越多，大家越得益，咪未開波已縛手縛腳。