曾智華 精彩人生自己創

懸疑驚慄兇殺片，成功的，永遠是編劇與觀眾捉迷藏，大家腦交戰，死都要做到——你估我唔到，你估我唔到。

不過，開場時，編劇通常的鋪排，是好似好易估。發展下去，高手的，會將你帶上高山再到海洋，過咗冰山後潛入海底，就如此玩到你反轉再反轉，最後才開估，令觀眾目定口呆，乜原來係咁。

新片《美傭誘罪》（《The Housemaid》），正是成功的典型，難怪原著小說可以大爆特爆，全球銷量超過二百萬本，長期高踞亞馬遜暢銷書榜。

事實，吸引小弟入場的預告片，並冇顯示甚麼奇情，只講述一個美麗少女到豪門應徵做女傭，女主人相當漂亮，而男主人更是型到爆——高富帥，若果佢走去做網戀行騙，相信十個有十個寂寞的心會中招。

此片首先最成功是選卡士，美麗女傭由悉尼斯威尼飾演，漂亮女主人則是雅曼達施菲，電瓜人的男主人由班頓史倫拿扮演。

三個絕高顏值主角擔綱，電影頭三分一，真的是悅目至極。

戲劇布局頭段，唔使估，係人都知必定是美麗女傭在某種機緣下，搞上了男主人。

呢點，電影廣告早早穿出，不過，對於跟著的劇情高潮起伏推進，完全冇影響。

兩位女主角尤其出色，皆由優雅大方演到歇斯底里，由溫柔開朗反轉成兇狠無比。

點解係咁？你入場睇吓咪知囉。兩個多小時長度，驚險場面環環相扣，令觀眾一路抓大髀，吓，乜原來係咁。然後，再一扭轉，又繼續拍多吓，乜原來又係咁。

相比之下，有電暈女性外形的班頓史倫拿，反而演技級數明顯不及兩女主角。

近年荷里活女星演出，不少完全豁出去，裸體裸到盡，今次扮女傭的悉尼斯威尼也如是。