曾智華

又到聖誕，又到聖誕！聖誕節，乃小弟及一班「和尚仔」（男校學生），上世紀七十年代初最大期待的節目。

點解？因有機會親近女性！

就讀聖若瑟書院，由小學到中學，皆食齋。但老老實實，發育期，當然對女性好奇，更想有機會接觸一下，但去邊處搵？

中一時，有嘞，一於去東華三院青年中心參加土風舞班，咁就可以手拖手跳《Oh！Susanna》啦，但仍無法滿足心願。

中三開始，較有「計」的同學已可透過聯校搞賣物會，結識女校學生，約出嚟睇電影。

我又如何？肥到成個波咁，得五呎二吋高，鬼有人吼咩。

到中四，校長皇恩大赦，開始鼓勵及批准正式接觸異性。一年一次，特許聖誕在課室開舞會，之前自己學寫信到聖保祿學校、嘉諾撒聖方濟各書院、聖保祿中學及庇利羅士，邀請同級女生來開舞會，但指定要下午進行。

得，大家夾手夾腳用報紙將所有窗封起，製造「黑夜」的浪漫感覺。

日子一到，扮成小紳士，等候女孩子來到，快舞跳完跳慢舞，不單可以拖手，更可以一擁入懷。對乜都未試過的怕醜「和尚仔」，真似觸電㗎。

我不幸，當時身形仍似個波，不停食檸檬，冇癮到暈。

終於立下決心，中四聖誕後，日日早上六點揸個籃球返學校操，不停彈跳下，講都唔信，由五呎四吋快速增高到五呎七吋。哈哈，搞掂！中五那年的聖誕派對，開始有女仔「騷」喇。當年經驗，沒齒難忘，聖誕節，真真是和尚寺內和尚仔普天同慶大日子。

之後我繼續跳跳跳，終於拉高到五呎八吋，從此，參加聖誕派對講「May I」時，已冇乜檸檬食喇。