時近聖誕新年，市道明顯較旺，高質素的菜館，在做冬當日及之前，訂位全爆。
老婆大人成個月前叮囑為夫訂房，與外家做冬，我大安旨意以為必定有，點知⋯⋯致電米芝蓮推介「賀賀澤」（開業年多已掂），老闆Bosco話：「碌Sir，唔好意思，爆晒，坐出面介意嗎？比張靚位大枱你。」
外家潮州人，「賀賀澤」即潮州話「好好食」，冇房就坐大堂，照殺。
前晚全家大細狂食之際，冷不提防一位飲食業老前輩突然出現，「碧儷苑」大老闆布基是也，布師傅帶同兩大拍檔Ben哥及寶哥，與一眾兄弟在此做冬。
老友，連資深行家都來做冬，「賀賀澤」的水平，真真心照。
布基入廚五十多年，由長洲街童捱起，日後有機會再講佢身世，點解幾歲小童工能成為今日著名飲食集團大老闆。
頭盤先上，為「黃金豬油渣炸魚皮」。呢味魚皮，幾年前由新加坡人始創，一度變必買手信，落到香港廚師手，立時將佢境界提升，如今水準已拋離新加坡，冇人再用當地出品做手信了。
跟上普寧豆腐拼雙棗。一啖咬落，覺得普寧豆腐與普通豆腐明顯不同，但又不知其所以然，於是問道於Bosco。
「碌Sir，你的感覺全中！普寧豆腐根本不是普通豆腐，我哋師傅跟足傳統正宗做法，用黃豆碾漿，加入石膏、水及番薯粉攪勻，以室溫令其變實，再切成方塊，放入大滾油，炸至四面金黃，外脆內軟，立即撈起瀝油。記住呀，必須蘸韭菜鹽水㗎，咁食，才有神奇化學美味。」
Bosco進一步指，坊間不少潮州店為方便及慳人力，只買市場一般豆腐再炸，咁做並不算是普寧豆腐，口感質素也完全冇得比。