關於我和網約車，唔講猶自可，講起把幾火，體驗差到一個點，中招次數比例之高，直情要懷疑人生。其中以U字頭的品牌最慘痛，曾經在香港遊艇會門外，被不知是何許人擸了我的那部網約車，司機明顯未有核實客人就讓其上車，乘客亦顯然未有核實車牌號碼。結果發現自己預約的車越行越遠，才驚覺被搶了車。
另一次是在青衣晚飯後叫車過海，等了又等，半小時過去，人車影蹤依然杳杳，看看手機，原來已被取消了柯打，超級氣憤。
還有一次，由鰂魚涌去元朗屏山鄧氏宗祠食盆菜，U記司機睇住Google Map都兜錯路，差點跟這位業餘司機元朗半日遊。
之後好一段時間都冇再叫U記，轉用另一個應用程式「HK Taxi」網約的士，落車才付費，取其職業司機，對路線的熟悉及路況的掌握，肯定勝過業餘或兼職的網約車司機。誰不知「HK Taxi」後來竟然被U記收購，焗住再轉搭「飛的」。
然而，網約車的最大問題是，急著要車又唔介意付出的乘客始終要等，等待過程中閒閒哋眼白白睇住十架八架的士擦身而過。近年港鐵路線網絡超級完善，由會展搭東鐵去沙田都只係二十分鐘。即使繁忙時間周圍都大把的士，除了上下班繁忙時段，排長龍等車的情景早已不復見，的士排長龍等客反成了日常。網約車的政策原則，必須按城市痛點出發，的士為主，網約車為輔，為市民提供點對點交通服務。網約車有助釋出私家車運載力資源，更重要是不論是網約車或的士司機均須敬業專業。