Kiri T（謝曉盈）推出新歌《藍剔未必是壞習慣》 ，由她親自作曲，陳廣杰填詞，Daniel Toh編曲及監製。或許在大家眼中，「藍剔」是代表着拒絕或落空，可是Kiri卻認為「藍剔」不完全代表悲傷和負面，而是代表「你看過我的說話」、「我們不太近，也不太遠」的一種微妙又浪漫的存在。其新歌《藍剔未必是壞習慣》將這種「不清不楚」重新詮釋，在已讀不回的狀態中，找到一點的療癒空間。
Kiri T首次澳洲開Show
Kiri說：「呢首歌嘅靈感，係源於喺我成長時期有好多歌曲講暗戀，但近年就好少關於暗戀、曖昧嘅歌，一係就熱戀，一係就失戀，咁我就諗不如我出一首暗戀嘅歌曲啦！然後發現暗戀嗰種『唔清唔楚』其實同被『藍剔』嘅感覺好似，哈哈！有時候我同埋身邊嘅朋友都會覺得，喺通訊軟件入面睇到對方一直一直顯示『輸入中』，就會好心急想知道對方想同我講啲乜嘢/覆我乜嘢；或者當你發現你被『藍剔』咗嘅時候，你會瘋狂喺度諗，點解明明睇咗我message但係唔覆我，係咪逃避我？然後每隔一陣又開返個對話出嚟睇吓佢覆咗你未，呢個係好糾結嘅情緒，就好似暗戀同埋曖昧咁！」
Kiri T上年舉行的個人演唱會大獲好評，近日飛出香港於澳洲墨爾本及悉尼舉行首個海外演唱會，有機會到澳洲旅遊的Kiri事前感到超級期待，她說：「第一次去澳洲，就係去開我嘅個人演唱會，真係好開心，再加上喺社交平台都知道好多澳洲嘅fans好期待我可以過去開演唱會，可以將我嘅音樂親身帶到去悉尼、墨爾本，現場唱畀大家聽！最難忘嘅係我估唔到去到澳洲，大家都可以一齊大合唱，唔係淨係副歌，係由verse（說故事的文字段落）開始就已經一齊大合唱，我真係好感動。」
