HOY TV一向以人為本，製作一系列節目建立獨有風格，而新一季節目，將更進一步實踐「以港為本，用性格魅力吸引觀眾」的宗旨，繼續為香港人服務，當中包括將於9月8日晚播出，HOY TV首部原創劇《我愛九龍城》，邀來已婚男神陳家樂夥拍小休復出的岑麗香，與栢天男展開一段撲朔迷離的感情關係，再加上敖嘉年、泰臣、姚樂怡、盧頌恩（妹頭）、蘇韻姿、李尚正及陳思圻等多位演員主演，台前幕後製作團隊精英盡出，期望重現九龍城的人情味，打造一套屬於香港人的電視劇。
有線寬頻通訊有限公司行政總裁兼執行董事杜之克對於這部電視劇寄予厚望，盼借此說好香港故事。
杜之克盼說好香港故事
杜之克說：「雖然呢套劇係叫做《我愛九龍城》，但係我哋想講嘅係香港嘅情懷，因為除咗好似我哋呢啲住咗幾十年香港嘅人，又或者一啲90後，00後嘅年輕人，都覺得香港嘅變化好大同好快，好多好熟悉嘅嘢慢慢變得陌生，變化得咁快，我哋好需要捕捉一啲共有嘅感覺，就好似戲裏面一句對白，雖然九龍城變得好快，但係人在人情在！呢個係我哋呢個故仔好想講嘅嘢。事實上由開拍到𠵱家，九龍城有好多舖頭已經消失咗！所以我哋希望喺呢個好短嘅時間，可以捕捉到九龍城嘅變化，呢個係我哋主要想做到嘅嘢。呢套劇有兄弟情，街坊情，愛情，其實都係講人情味。今次我哋有超過40個演員參與，除咗當時得令嘅演員好似陳家樂同岑麗香等，你會見到一啲好熟悉嘅演員，亦有一啲意外驚喜！幕後團隊就包括港、台兩地嘅精英，若果出到嚟嘅效果，大家發現同其他香港嘅劇集有唔同嘅話，希望大家會明白我哋心思同誠意。」
講到兄弟情，早前陳家樂、敖嘉年和泰臣就拍攝了一場靈堂打架戲，家樂更化了醉酒妝上陣：「劇情講我哋兄弟喺靈堂打麻將飲醉咗，最後同二哥嘉年大打出手，都好瘋狂下。」嘉年也說：「打到最後亂晒籠，開始亂掟花牌同元寶，櫈都飛埋出嚟，我唔記得係我定家樂掟，好彩冇受傷，但呢場戲好過癮。」劇情講述由許紹雄飾演的爸爸設靈，三兄弟帶着複雜的情緒現身，出拳起腳之前先攻打四方城，泰臣更推介靈堂雀局：「咁樣先有運氣，手風順同牌品好，靈堂雀局係新興娛樂事業，好有feel，空間同環境極具質感，打牌發出嘅聲音迴響令人振奮。千祈唔好覺得係呢種地方，百無禁忌，贏咗就係勁啦！」
眾星回憶當年的九龍城
作為首套HOY TV首部原創劇，《我愛九龍城》邀來大批演員客串，幾乎每個鏡頭都有好戲之人客串，好像許紹雄、麥家琪、馮素波、潘紹聰、黃澤鋒、古明華、利穎怡、劉錫賢、J Arie、小肥、黑妹、岑潔儀、李文標、七仙羽、徐志雄、鬼塚、蕭徽勇、方燦高等等，陣容鼎盛。大家說到參與製作都非常開心，更說來到九龍城勾起很多昔日回憶。
波姐指九龍城對她來說十分親切，侯王道更是她父母相戀的地方，她自幼住獅子石道，又在此上學，至今仍很懷念九龍城區。黃澤鋒說：「細個時蛀牙，通常會去九龍城寨搵一啲無牌牙醫，好似倒一啲鉛入去補牙。」李文標說：「我初入行時加入邵氏，我哋出發嘅地點就係喺某間餐廳，我哋成班人拍攝光頭戲份，所以成班光頭仔好似和尚咁喺果邊出發，然後去邵氏片場拍戲。」
另外，不少演員雖然演戲多年，但是原來這次是第一次合作，飾演姚樂怡老公的泰臣說：「我同好多女藝人合作，好多老婆都係靚嘅！但係最靚就係佢啦！」姚樂怡都說很開心跟泰臣第一次合作：「佢畀我嘅印象係搞笑嘅！估唔到佢認真做戲都非常之好！」
OST女王菊梓喬演繹主題曲
為了隆重其事，主題曲《回望》找來有「OST女王」之稱的菊梓喬主唱，Hana坦言這首歌有難度：「呢首歌頭頭係好平坦，所以要去思考每一個字點樣唱，大家可以特別聽聽副歌嘅部分，希望我說故事嘅通透力高啲，令大家一聽到首歌，就會諗起故事嘅發展。」而星演旗下的歌手康志維就主唱插曲《不想太多》，這首歌亦是康師傅第一首擔大旗的作品，希望大家會喜歡他的演繹。
