Tyson Yoshi昨晚（16日）現身澳門，擔任「塗浪狂潮派對」表演嘉賓，身穿灰色背心現身的Tyson Yoshi大騷「麒麟」手臂，一連唱出《 I don’t smoke & I don’t drink》、《That Guy》、《Love you & your friends》。變瘦了的Tyson接受訪問時，笑言婚禮期間亂吃東西，擔心變肥，於是勤操肌及計算食量。談到太太是否滿意他現在的身形？Tyson 笑指太太沒選擇，她喜歡老公有肚腩，惟未來五年都不會發生。
Tyson享受被「攻擊」
談到在台上獻唱可有留意台下泳客？因為早前在同一場地任表演嘉賓的張敬軒形容「波濤洶湧」。Tyson笑說：「我都有波啦！軒公冇波，咪𥄫人對波囉！我初時仲笑人啲水槍廢，講完後悔，有個男士喺左面食住啲風，每一下射中我。」問畀人射水感覺如何？Tyson笑言有點享受，期閒有人向他射暖水，相信不是尿液，又笑指若主辦方畀得起錢，他可參與水上商演，而自己的演唱會就毋需玩水被人射，「其實我上台前有問過可唔可以跳落水，但原來好淺水，跳落去會斷腳！」另外，提到獨立歌手ProdiG（江學鏞）在社交網發文指歌曲《Growing Up》是為Tyson作曲兼填詞寫的第一首廣東話，最後變成獨唱版本，又指Tyson虛構癌病小朋友故事呃粉絲，Tyson坦言ProdiG經常發牢騷，對方可能情緒不穩定，惟談及癌病小妹妹就要出聲。
Tyson續說：「小妹妹個哥哥搵我，話可以幫我做證，仲話好彩爸爸媽媽睇唔到，因為屋企要Move On好難。你要發癲搞我冇問題，無端端搞人屋企，我覺得佢唔係欠我一個道歉，我亦唔欠佢一個道歉，但佢欠嗰一家人道歉囉！」談到ProdiG指Tyson向PR表明不想見到某些Artist，打壓其他藝人，Tyson說：「我都唔知講咩好，我要拎嘅證據出晒嚟！我諗佢火遮眼，如果佢想搞我，衝動咗，欠缺少少計劃。」
Tyson︰ProdiG情緒不穩
問到跟ProdiG是否再見亦是朋友？Tyson說：「其實我識佢好耐，熟就唔係好熟，但見面時佢係超級有禮貌，次次聽人話佢Send訊息鬧人，我覺得佢情緒有時好難管理。（介意同ProdiG同場出席活動？）冇所謂，我都係賺錢！創作就唔好，如果我想執粒音，唔知講唔講好，又怕佢唔開心。《Growing Up》我話出咗Solo先，之後同佢出Remix，其實我好婉轉同佢講，好難直接講唔啱用，我話我出咗先，見佢無follow up就算啦！錯就錯在我無斬釘截鐵同佢講『唔用啦』！」
Tyson林家謙紅館騷舉中指
再提到張敬軒早前一則「菠蘿包」帖文釀起罵戰，問到可有擔心對方？Tyson表示有傳短訊予軒公，對方回覆表示「All Good」。提到林家謙即將紅館開騷，Tyson表示自己並非嘉賓，可能跟魏浚笙、Serrini入場欣賞。不帶太太入場？他即說：「再講過！老婆。（如有Kiss cam再錫過？）家謙演唱會唔會有呢啲，如果影到即刻畀隻中指。」
