美股上周五經歷急劇調整後，今個星期開始穩定落嚟，重拾回升動力，甚至可能震走獲利盤及有欠信心嘅投資者後，升勢會更急。目前估計美股能夠持續多數周升勢，然後先至要擔心較大調整殺到。
先講基本因素，即使上周五美國公布非農就業人口修訂值非常嚇人，7月初值7.4萬遜於預期嘅10.6萬，6月終值由14.7萬大幅下修至1.4萬，5月終值由14.4萬下降至1.9萬；不過，勞工部有提到當中涉及再收取額外統計樣本所致，即可能係統計方式改變導致。
假若撇除非農數據，單睇失業率4.245%其實冇乜大問題，毋須擔心因為就業市場失速而導致經濟衰退，更大可能係AI發展令失業人數增加嘅持續現象。至於再早前公布嘅第二季GDP按年增速3%，反映經濟增長穩定。
點解要咁樣講經？原因係目前美股面對經濟增長、減息、企業盈利、關稅戰呢四方面，相比今年2月美股高位時能見度更高，換言之，美股下一轉高位，值得明顯比2月時高得一段距離，而目前高出5%顯然未夠。若簡單地高於2月高位大約一成，納斯達克100指數NDX都能夠喺中線升浪高位見到24444點，將呢個數字作為中線高位，已經偏向保守。
Meta中線料挑戰1,000美元
有見及短線急調整過後，美股升勢有望持續，加上NDX高位未形成技術超買訊號，例如日線RSI頂背馳，估計美股仍有數周升勢。下個重要關口，或許係9月17日嘅聯儲局議息，假如到時NDX出現頂背馳，指數明顯超出2月高位比較多，先至有中線調整壓力。
個股方面，Mag7股份業績非常好，例如微軟（MSFT）及Meta（META）均顯示出AI帶動強勁變現能力，絕對係拉高美股嘅其中一項因素。除咗未公布業績嘅英偉達（NVDA）之外，業績最標青嘅係Meta，AI驅動用戶使用時數上升兼廣告轉換率提升，幫助收入加快增長，有望推動股價持續強勢，中線料挑戰1,000美元，然後等拆細。
晉佳
