一名穿T恤和短褲的女子早前乘搭港鐵時，懷疑被一名短褲男子偷拍腳部，於是鼓起勇氣跟隨男子下車在月台上對質。在面對對方求情時，女事主坦言「我俾機會你，邊個俾機會我？」。女事主另特地稱讚在場協助的港鐵職員：「今次地鐵職員真係要讚佢哋！今次真係做得好好，好彩有佢哋嘅保護，如果唔係嗰個男人真係會不停走埋嚟我身邊騷擾我」。詳情見下圖及下文：
港鐵短褲男疑偷拍女子腳部 港女鼓起勇氣對質逐張睇↓↓↓↓
女事主指罵：你離晒譜呀
樓主昨日（27日）在社交平台Threads以「地鐵偷拍狂——我俾機會你，邊個俾機會我」為題發帖，上載對質短片。短片顯示至少有4至5人涉事，包括短褲男、女事主、港鐵職員和其他女乘客。
短片中，相信是女事主的女子正在指罵短褲男：
其他女乘客：唔好呀，無得唔好呀。
女事主：你離晒譜呀，我頭先俾咗機會你，我睇住你影㗎。全世界睇住佢delete嘅頭先。
其他女乘客：我哋全部睇到。
其他女乘客：係呀。
其他女乘客：你唔使驚，我哋全部睇到。
港鐵職員：唔好郁，唔好郁呀。
其他女乘客：你唔好郁佢呀。
女事主：離晒譜，你呢啲人呢，俾機會你呢，你永遠都係做呢啲嘢㗎。我唔會俾機會呀。我俾機會你，邊個俾機會我呀？邊個俾機會我呀？
相關閱讀：鹹濕伯偷拍港女「斷正」 陪同家人無阻止仲咁回應 網民：令人心寒
港鐵回覆《星島頭條》查詢時表示，翻查相關記錄，相信是本月24日旺角站有乘客懷疑被偷拍的事件。當時職員收到通知後到現場協助乘客，乘客自行報警，事件已交由警方處理 。警方表示，事件中以涉嫌「遊蕩」拘捕一名61歲彭姓男子。
女事主留言講述詳情
因應帖文，有自稱是女事主的網民在回應欄留言：「我係當日嘅事主，我已經報警處理咗當日嘅事情」，並講述事件詳情：
「我喺地鐵上發現有人疑似偷拍我，當時我著住T恤同短褲，留意到呢一位陌生男子用手機對住我嘅腳位置影相。第一次我用眼神警告佢，然後佢再做第二次，我即刻覺得唔舒服同被侵犯隱私，於是決定跟佢落車同佢對質。
我問佢有冇偷拍我，佢一開始唔認。但我要求佢打開手機俾我檢查，結果發現佢手機入面有兩張我嘅腳嘅相。係未經我同意下偷拍嘅，我覺得非常唔尊重同不安。雖然有人可能覺得影腳嘅相係小事，但對我嚟講，呢種行為係完全唔尊重我嘅隱私同個人界線，特別係我同佢素未謀面，佢無任何理由影我嘅相。
為確保佢無保留其他偷拍相，我追問佢仲有冇其他相。喺我同一位內地遊客（現場目擊者）嘅要求下，佢打開手機一個file（檔案），入面除咗我嘅相，仲有好多其他喺地鐵偷拍女性嘅相，全部都係以類似方式（例如聚焦腳部或其他身體部位）偷拍。呢啲證據清楚顯示佢有系統地偷拍唔同女性，絕對唔係單一事件。
佢亦喺我面前del（刪除）咗整個檔案夾入面嘅相。但佢之後態度轉變，開始靠近我，語氣似懇求咁要求我原諒佢，仲叫我唔好報警。佢嘅行為令我更加唔安心，所以我決定報警處理」。
相關閱讀：紋臂港女疑「真空」搭港鐵 乘客偷拍被狂轟
女事主：唔應該叫佢delete相
女事主接著透露：「呢個唔係我第一次遇到偷拍，但之前我因為無勇氣同唔知點處理，一直無採取行動。今次我鼓起勇氣同偷拍者對質同報警，係希望保護自己同其他可能受害嘅人。我認為任何人嘅隱私都應該受到尊重，無經同意偷拍他人係完全唔可接受嘅行為。
警察最後嚟到話因為佢del晒啲相，所以係唔能夠用偷拍呢個理由去拉佢。警方嗰邊就話我唔應該叫佢delete（刪除）相，但當時我真係太心急，第一次處理，所以當刻就叫佢del影到我嘅相。
但係警察嚟之前佢不停靠近我，就算有地鐵職員保護我都不停靠近我，所以警察最後都用遊蕩罪拘捕咗佢」。
在回應網民時，女事主還指：
•今次地鐵職員真係要讚佢哋！今次真係做得好好，好彩有佢哋嘅保護，如果唔係嗰個男人真係會不停走埋嚟我身邊騷擾我。
•嗰刻其實內心好驚，但我想反抗，所以最後都選擇咗反抗，以聲量掩蓋自己嘅內心嘅恐懼。
不少回應的網民都力讚女事主：
•唔好姑息呢啲人；
•好欣賞你好有勇氣；
•好欣賞你呀真係好勁；
•做得好啊，唔應該俾機會呢啲人；
•呢啲人唔可以俾佢得逞，做得好；
•你哋做得好好，呢啲人唔應該俾機會；
•做得啱呀，真係唔可以放過呢啲變態佬；
•你做咗好多女仔都冇勇氣做嘢！ 簡直係女性嘅榜樣；
•做得好呀！超級respect（尊敬）！！講得好！完全支持你嘅行動！變態佬抵X死！；
•做得好，地鐵真係多咗人偷拍，有啲學生或怕醜女仔怕事唔敢出聲，就養肥咗咸濕佬個膽。
另有人分享自己類似的不快經歷：
•今早巴士都係，將部手鏡頭向住我，我即時拎起手機向返佢，跟住佢即時擰開手機；
•呢啲一定要制止＋搞大佢。千祈唔好覺得俾人影幾張相好小事，因為你一定唔係唯一一個！我試過一次，當時有位哥哥好正義咁樣同我捉住咗偷拍嗰個人，一開相機全部都係喺電梯從下角度偷拍唔同女仔腳同裙底嘅相⋯⋯當時我叫佢剷除晒，諗返起好後悔冇直接報警。所以嗰一刻你唔單只係為自己，都為咗好多女仔伸張正義！！絕對支持。
資料來源：entertainmentbaby1997＠Threads
相關閱讀：銅鑼灣男疑偷拍朋友裙底春斷正 網民直擊過程：Ｘ街到連熟人都落手 最後一舉動感恐怖↓↓↓↓
有網民在銅鑼灣一個商場發現有男子疑搭扶手電梯時，拿手機「低炒」偷拍女子裙底春，最令人吃驚的是男子與被偷拍女子是朋友，女子和男子傾計期間，懷疑在不知情下被偷拍。樓主於今年3月4日在社交平台Threads發布事發影片，引發熱烈迴響，她直擊過程如下↓↓↓↓
