能夠笑納陌生人的暖意，確是雙向的幸福。有好心地女乘客昨日（19日）透露了一段港鐵車廂讓座奇遇，一位精靈婆婆列出了兩大接受讓座守則，第一項是一定要講唔該，第二項則與落車有關，網民對此大表讚賞，形容「好人變老都係好人」。詳情見下圖及下文：
港女車廂讓座奇遇 精靈婆婆列兩大接受讓座守則逐張睇↓↓↓↓
樓主講述車廂奇遇
樓主昨日在社交平台Threads發文講述這段車廂奇遇，指「今日非繁忙時間坐地鐵返工，有個好老嘅阿婆渣住拐杖搖搖up up（岌岌）咁，我就讓個位佢坐。個車廂之後越來越多人。忽然，個阿婆超大聲同我講：
阿婆：小姐唔該晒你！我下個站落車，宜家俾返個位你！！！！！！！！！！
我：婆婆我聽到，唔使咁大聲。
阿婆：我驚其他人聽唔到，坐咗你個位呀！
咁個位唔係我私人擁有嘅，人人都可以坐，但呢個阿婆真係好識做人。
後記：我同阿婆講起，佢話佢嘅阿婆朋友興咁樣：
阿婆：1. 如果有人主動讓座，一定要坐，一定要講唔該，千祈唔好搞到氣氛尷尬；
阿婆：2. 落車前俾返個位讓座嘅人，再多謝佢；
我：點解網上睇到嘅老人家，同你講嘅差咁遠？
阿婆：佢哋應該唔係我朋友」。
相關閱讀：港女落馬洲過境回程疑血糖低頭暈 遇上好心人3大幫忙 一原因網上出Po急尋讓座女
網民大讚婆婆可愛
回應的網民大讚這位婆婆的做法，形容「好人變老」、「好人變老都係好人」、「好可愛嘅婆婆」、「阿婆有借有還！」、「婆婆醒目又識做」、「呢個婆婆好得意」、「呢位婆婆就做得啱啦」、「可愛又好嘅婆婆值得尊敬」。
有人更加指出「婆婆好可愛，希望人人都以禮相待，少啲戾氣」、「呢啲咪正常老人家囉，起碼識講唔該，唔係老奉」、「如果個世界多返呢啲老人家咪幾美好，唔係恃老賣老」。
原來，不少網民讓座時也遇過類似的可愛長者：
•我都遇過呢啲公公婆婆，成件事窩心好多；
•我上次都係，阿婆特登去撈我隻手，確保我坐得返個位；
•我都試過讓咗個位俾個老人家之後佢落車叫返我過去坐低；
•我都試過。不過我自己真係睇人嚟讓。有需要一定讓。戰鬥格阿婆一定唔讓；
•我都遇過。佢只係坐幾個站，落車前一定要我坐返個位先。咁咪幾好，互相尊重；
•我都試過，孭住書包，個婆婆yap（正字為「𣚕」，招手的意思）我過去，話佢就落車俾個位我坐；
•我噚日都有差唔多經歷，我讓位俾伯伯，伯伯一見到佢隔籬有位就叫我坐，到佢落車佢又同我講唔該晒，呢位伯伯好可愛；
•我都遇過呢類婆婆，另一半讓咗個位俾婆婆坐，之後行咗去車門附近，過咗好多個站之後婆婆同我講佢下個站落車，叫返你朋友仔過嚟坐；
•婆婆勁Cute Cute（可愛）。我曾經讓座俾個婆婆，佢坐咗幾個站準備落車（當時都多人），佢一直企喺個位前面揮手叫我，我行到過去佢話要俾番我坐；
•試過食飯有類似情況，個陣6:00搭枱，都係同婆婆，問咗佢個位係咪無人，跟住出去攞餐，然後返嚟嗰陣見到有個男人想坐呢個位，婆婆即刻就話：「個位已經留咗俾呢位小姐！」。
相關閱讀：傷殘青年坐城巴關愛座遭罵逼讓座 大嬸要求出示傷殘證：「我點知佢跛㗎？！」熱心大叔代抱不平
網民稱讚樓主讓座舉動
還有人指「試過拎住成手嘢，得番個關愛座，都諗住企下算。唔小心同隔籬婆婆對上眼，無聲默契下佢坐咗去關愛座，讓咗佢個位俾我……「我夠老，等我嚟啦」，真心多謝佢」。
樓主回應稱「好Nice（令人愉快）嘅阿婆。我都聽過朋友講佢返完Night shift（夜更）得返半條人命，眼前有個關愛座都唔敢坐。然後有個阿婆同佢講「你係咪好唔舒服呀？快啲過嚟坐下啦」，講完就又去咗坐關愛座」。
也有人稱讚樓主的讓座舉動，「個人很喜歡自動讓位給長輩的人，首先一定不是忘我地玩手機，而是願意看身邊的情況而做出善良的舉動，超讚」；另有人則自爆「我讓完座會怕尷尬行去另一卡」。
還有網民趁機發長文，講述讓座做好事與難得懷上身孕的巧合：
「我試過讓位俾阿婆，佢好開心，佢話佢之前坐地鐵無人讓，地鐵一Chok（擢）佢整親，所以而家用拐杖。講完無耐，地鐵無啦啦好Chok， 如果我無讓位俾佢，佢一定會跌倒。之後佢好感激我，又話好彩我讓位俾佢。
我不嬲有讓位俾人嘅習慣，我好耐之前坐巴士屯門公路塞車，見有個女人好似好辛苦咁企住，我望望下見佢好似大肚，因為佢好瘦，正常無咁肚腩，佢個肚唔係好明顯，不過我見佢好似好辛苦，我就讓位俾佢，佢又係好感激咁，我見佢摸個肚，我估佢係有咗。
無幾耐我自己就有咗BB，我好記得未婚前睇過醫生，醫生話我好難有BB，但我婚後3個月已有，可能做得好事多」。
資料來源：ilikehashbrownssss＠Threads
相關閱讀：企上層拒落累停駛 巴士男賴死獲大嬸主動讓座 網民：面皮幾厚先做得出↓↓↓↓
網上今年2月熱傳有男子堅持企巴士上層，令巴士車長為行車安全停駛，男子「賴死」的行為，終獲一名大嬸主動讓座，惹來網民熱議。有網民在「車cam L（香港群組）」FB專頁發布影片，顯示當時情況如下↓↓↓↓
