不少涉及死亡的新聞都會見到「仵工將屍體舁送殮房」講法。仵工，俗稱「忤作佬」，搬運遺體是職責之一。有仵工在社交平台Threads以「仵工日常」為題發帖，講述工作時遇到的種種，揭開這份職業的神秘面紗。說到死亡這件人生最終大事，有網民鄭重提醒要「活在當下多珍惜」。詳情見下圖及下文：
仵工自爆工作日常 墮樓案遺體完整度講彩數？ 最恐怖案例與矛狀防盜欄有關逐張睇↓↓↓↓
樓主：自行斟酌是否繼續閱讀
樓主早前發佈的其中一個「仵工日常」帖文，便講述工作時處理墮樓遺體的不同情況：
「呢個Post（帖文）會解答對跳樓自殺有誤解嘅人，但將會描寫得好詳細所以會好血腥或者噁心，請自行斟酌（是否繼續閱讀）。
有人同我講佢見過跳樓自殺嘅人同熒幕上嘅差唔多，冇我所講得咁恐怖。咁我會話係個先人好彩，喺跳落嚟嘅過程冇撞到任何嘢同高度唔太高，所以個衝擊力唔足以令遺體支離破碎。
我做過一單跳樓自殺案係個遺體跳落嚟嘅衝擊力可以撞穿有玻璃上蓋嘅行人路，亦都見過跌凹咗行人路嘅欄杆。以上嘅情況都無一例外係成個遺體係散晒，一般最常見嘅係地下會有一灘血水，頭骨碎咗散落周圍，再常見嘅係攔腰式，而腸個範圍啲內臟跌晒出嚟」。
樓主接著稱，「以防再有人問我遇過最恐怖嘅跳樓Case（個案）係點，我喺度一次過講埋，都係嗰句自行斟酌（是否繼續閱讀）。
好記得嗰晚係凌晨，咁個屋苑啲防盜欄係好似外國嗰啲，個頭個頂係好似一支矛咁。好不幸地嗰次先人就跳中喺防盜欄上面，頭皮掛咗喺支矛上面，上半身都係掛住喺防盜欄度，而下半身就喺屋苑外面。慶幸嗰陣係夜晚又冇乜燈，唔係嘅話我都相信自己都可能會作嘔……」。
相關閱讀：紅磡殯儀館$45000超高薪請仵工 工作職責曝光惹熱議
樓主：要當場執手尾
有回應的網民好奇查問「你要當場去執手尾㗎？」，樓主大方回應「一定要，除非啲肉／內臟已經碎到執唔，到同埋黐實晒喺地下」。
此外，似乎有行家留言指「有時做高處墮下嘅Case，去到現場，可以叫做人體爆炸，可想而知有幾散。又試過做一位女士高處墮下，她大部分內臟由佢嘅下體擠出」。樓主和應「試過200幾米外都仲搵到啲碎骨」。
有人引述樓主的行家稱「我朋友係你同行， 有次東涌有單先人喺落地最尾嗰段同牆擦著落，散晒，佢同我講話盡執，大嚿啲用夾刮返落膠袋」。樓主於是就相關情況補充細節「大嚿嗰啲，我哋都係戴住手套咁執起，搵個膠袋裝好再放入屍袋入面，等殮房Ching（師兄）／法醫處理」。
另有網民憶起舊事——「我讀書時遇過唔止一次跳樓，多數都係心中有感，感覺下再望向特定方向，PoP（泊）一聲或「拍」一聲⋯⋯見過要『執』返嘅，我震撼嘅通常唔係先人，震撼嘅係家人反應與後著，在生之人要多愛身邊人，活在當下多珍惜」。
防止自殺求助熱線：
「情緒通」精神健康支援熱線：18111
香港撒瑪利亞防止自殺會： 2389 2222
生命熱線： 2382 0000
明愛向晴軒： 18288
社會福利署： 2343 2255
撒瑪利亞會熱線(多種語言)： 2896 0000
東華三院芷若園： 18281
醫管局精神健康專線： 2466 7350
賽馬會青少年情緒健康網上支援平台「Open 噏」：http://www.openup.hk
資料來源：______iloveyou3000＠Threads
相關閱讀：紅磡殯儀公司「爭議價」請仵工 須識英普粵電腦文書繪圖 要駕靈車抬棺遺體處理做儀式 網民譏：黑工都唔做↓↓↓↓
有位於紅磡的殯儀公司早前公開招聘仵工，人工被指出手過低，引起爭議，該仵工職位，資歷要求除粵語外，須具一般英文及普通話能力，並懂電腦文書，並識用Mac機做電腦繪圖，工作包括駕靈車、抬棺材、幫先人穿衣化妝、遺體處理、做儀式等等一腳踢。
有網民認為，該工作要求及薪酬不相配，譏諷「黑工都唔做」，有殯儀業界人士表示：「個市場已經壞咗。」有關仵工招聘薪酬詳情如下↓↓↓↓
