有應屆考生考畢DSE（中學文憑考試）後即做兼職，一名18歲的乖乖女賣力工作，勤力為咖啡拉花，日前勁賺了人生第一個5位數字的薪金，興奮拍照與網民分享喜悅。不少網民以過來人姿態教樓主如何理財，但也有人唱反調，因一理由建議散盡薪金。詳情見下圖及下文：
考畢DSE即做兼職 勤力乖乖女咖啡拉花勁賺5位數字 逐張睇↓↓↓↓
網民苦口婆心教理財
樓主本月8日在社交平台Threads上載大疊500元的相片發帖，留言指「DSE完咗嘅第2日就去咗返工，18歲前賺咗人生嘅第一個1萬，唔知點解莫名有啲感動」。
樓主並在回應載上載工作時的靚靚咖啡拉花相片，補充「返嘅係part-time（兼職），有好多好好嘅同事，鍾意呢份工，返得多賺得自然多。我都想轉full-time（全職）奈何之後仲要返學。不作任何介紹，大家小心DM嗰啲搵工呃錢黨啊！！希望咁多位DSErs（應屆考生）都盡快搵到工，賺錢買想買嘅嘢」。
5月中時，樓主已上載兼職花絮相片，指「同事一返工就買咗『笨Nana』（雪條）俾我，打敗99.9%香港人」，可見樓主老早已跟同事融洽相處。
不少回應的網民除替樓主高興外，還都以過來人姿態留言鼓勵，和苦口婆心地教路如何理財，最大路的就是養成儲蓄習慣：
•好叻！儲起啲錢啦；
•未來有好多一萬等住你，加油；
•好好儲蓄，將來可以搵更多錢投資；
•加油，好叻，人生仲有好多個萬等緊你；
•萬丈高樓平地起，為展開人生新一頁加油；
•後生記住要儲錢！當你年紀愈大愈儲唔到！！！；
•賺錢係成長第一步，理財係第二步，加油啦年輕人；
•人生第一份糧其中用少少獎勵吓自己，其他存起佢；
•一定要儲錢，那怕$500/$1000，到你儲到10年就好開心；
•過來人忠告，盡量唔好用信用卡，唔好借錢，唔好先使未來錢；
•立即存$8000。過來人提醒，一有工作即做定期，迫自己每月存1/3人工；
•如果當年我都識諗迫自己儲錢，就唔會到依家都未儲到……愈大愈儲唔到係真；
•千祈千祈唔好比人知人身邊有幾多錢，千祈唔好借錢比任何人包括屋企人，千祈千祈要儲起佢唔好使晒；
•加油， 姐姐話您知人越大越多金錢煩惱呀！記得儲錢，好好理財，唔好先使未來錢。購物時諗清楚係需要定想要；
•唔好亂使錢，最好依家養成儲蓄習慣同繼續返part time，咁過多幾年畢業之後就有一筆資金去置裝搵工同埋進修喇；
•記得要有儲錢嘅習慣，唔好理多定少，起初可以規劃好一半以上嘅錢係儲住唔好用，另一半任你點使都得，養成每次一有錢，點都要儲起一部份，無突發事都堅持唔好用嘅習慣，我當年啲暑期工錢每次都係劈返落去自己嘅教育基金度。
另有人提醒樓主記得「同屋企人分享下，例如請食飯」、「出糧記得請屋企人食餐飯，平貴都好，爸爸媽媽都會好開心」、「第一份糧，請屋企人食嘢，買下小禮物俾佢哋，佢哋會好開心」、「恭喜，記得好好善用同儲起，可以嘅話請屋企人食大餐，佢哋會好開心㗎」。
還有人有另類建議：「儲埋一堆自己喺房度，一次過拋晒向天，雖然會執餐死，但係好Ｘ爽，10年前嘅我試過一次」、「留$500或$100現金，搵個信封儲起佢，我當年有咁做，而家睇返，呢個係人生第一次賺嘅錢，好開心」。
有網民因一理由鼓勵樓主花錢
不過也有網民與儲蓄派唱反調，有人鼓勵樓主花錢，有人甚至建議使晒佢，「用呢1萬去搵你人生最青春最難忘嘅經驗」：
•去個旅行先；
•好好享受，珍惜呢個感覺；
•人生好漫長，慢慢用買自己意嘅係好甜；
•第一次出糧真係好開心，好好諗下點用啲錢啦；
•明白啦有血有汗，好好慶祝下，自己諗下點去處理第一份血汗錢；
•趁後生去多啲旅行，尤其依家啲yen（日圓）咁平，唔好聽啲傻Ｘ講儲起佢；
•往後人生無比呢一刻更有錢，更可以做你想做嘅嘢，好好享受依家可以盡情使錢；
•恭喜。啲人話要儲1/3人工嗰啲我覺得你仲細唔使點理住，趁後生去下玩，食餐好，咁樣會有動力好多；
•唔好理人哋講咩儲錢，你呢個年紀正正係使錢使得最開心嘅時候，將來返工搵錢嘅時間多的是，學生哥賺到錢就獎勵下自己，應使則使；
•千祈唔好怕使錢，錢永遠搵得返；但同時千祈唔好貪方便申請信用卡甚至碌爆佢，有幾多使幾多就算，你永遠想像唔到碌爆咗嘅卡有幾難還。
網民懷舊想起當年
另有網民因而想起當年，自己賺取第一筆薪金時的美好曾經：
•當年我第一次返pt（兼職）都好有成功感；
•恭喜！付出就會有收穫，我一考完DSE即刻返工到依家已經1年，儲咗12萬了，一年後你都會係咁；
•我都係啱啱考完DSE 5月2號即刻去做，出糧嗰一刻真係好開心覺得所有辛酸勞苦一剎那化為烏有；
•2022年完DSE，當時仲封關，無得旅行，所以留係香港part time炒散，幾個月加起來儲到兩萬幾，夠交大學第一學期嘅學費，都幾開心；
•當年我是做暑期工，賺了$4000-$5000左右，忘記給我媽$1000還是$1500，當時我媽木無表情，完全沒有一絲開心，哦一聲收下，之後才知她嫌少，她說人家李太兒子給一半工資作家用，可是人家兒子賺$3萬啊；
•俾啲掌聲自己你好叻。記得當年為咗同個fd（朋友）暑假去旅行，未到暑假已經返pt（兼職），我個年代無中學grad trip（畢業旅行），大家暑假想去玩都要返pt，呢種自己賺錢自己去玩嘅感覺好自豪；
•我都記得第一份糧嘅感受。第一份工開始將人工分3部分，減家用後，1/3儲，唔郁。or any（或任何）保護investment（投資）；1/3可動用嘅儲備。去旅行買電話咩都好；1/3平時使，如果有其他fixed cost（固定支出）照減先再分。
資料來源：yzvon0.o＠Threads
相關閱讀：25歲小店老闆自爆賣水晶發跡史 靠全民派1萬元起家 唔會$2000攞貨賣過萬 最多賺呢個數↓↓↓↓
一名年約25歲的小店老闆，近日在網上自爆賣水晶的發跡史，靠著2020年時港府「全民派錢」的1萬元起家，強調做生意不會攞2000元的貨色轉賣過萬元，最多只會賺呢個數。創業故事相當勵志，獲不少網民支持，鼓勵繼續加油。詳情見下圖及下文↓↓↓↓
