黃澤鋒以愛抵禦：有兩個係福氣 58歲陳麗麗再孕被毒咒生多個「送終」 丨獨家

黃澤鋒與同齡妻子陳麗麗月前宣布懷上第二胎，消息旋即引發熱議。皆因2019年，陳麗麗已以52歲高齡誕下大女「小黃妃」（黃熙恩），如今再以58歲「超高齡」懷孕，無疑創下香港演藝圈高齡產婦的新紀錄。然而，這份遲來的喜悅，卻意外引來部分網民的惡意批評，毒舌詛咒「生多個送終」。面對無端攻擊，黃澤鋒夫婦選擇以堅定而豁達的態度回應，更呼籲：「香港人開心啲啦。」採訪：方騫平 攝影：朱偉彥

黃澤鋒不滿惡言負評，陳麗麗反而豁達騎騎笑。

黃澤鋒接受《星島頭條》訪問時展現出超然態度，不避諱地自爆曾受惡毒詛咒。

陳麗麗則採取「唔理」的態度，專注於現實中的溫暖。

58歲陳麗麗係超高齡開心孕婦。

黃澤鋒、陳麗麗同心合力建立幸福4口家庭。

黃澤鋒負起男人應有責任。

陳麗麗預產期係今年9月，兩公婆開心迎接新生命。

黃澤鋒一家3口一條心。

回顧6年前老年得女的經歷，黃澤鋒與陳麗麗對「小黃妃」疼愛有加，但他們強調寵愛方式講求方法，是「有規有舉」而非溺愛。日前兩公婆帶小黃妃上英文課，上課前會讓女兒玩一下手機放鬆心情，但他們在管教上反而更加嚴格，絕不放縱。黃澤鋒解釋道：「今日細個唔管，將來會更辛苦。」 他尤其重視監控女兒使用電話的時間，並分享經驗之談：「小朋友一打機就變咗冇咗靈魂，周遭嘅嘢都聽唔到。」 陳麗麗完全認同：「所以我唔會手機放題，最盡畀玩一小時，玩得太耐第二朝冇精神。佢𠵱家經已問我『幾時可以話事？幾時可以去街？幾時擁有鎖匙及手機？』」 

兩公婆雖然唔係大富大貴，都會揼本畀囡囡學習。

小黃妃有快樂童年。

小黃妃好嗲爸爸。

6歲小黃妃原來最愛睇網上直播購物，而非卡通片。

要講得出做得到

母女間的互動也充滿智慧。例如小黃妃不愛吃蛋，陳麗麗會耐心「講數」：「我會叫佢食蛋幫助增高及長肉，因為有啲運動要達標才做到，咁樣佢就會答應食，我同囡囡相處，大家都要講得出做得到。」黃澤鋒則笑爆兩公婆會玩「扯貓尾」策略應對女兒的駁嘴：「囡囡成日駁嘴，不過對住佢勞氣都冇用，我會同佢講悄悄話，教佢點樣去避開阿媽火山爆發時候。」 

黃澤鋒、陳麗麗唔容許小黃妃揀飲擇食。

今年母親節舉家睇《阿媽有喜》首映。

好動小黃妃喜歡玩攀石。

小黃妃有黃澤鋒真傳，游水都好叻。

 

小黃妃曾奪親子填色比賽季軍。

陳麗麗對女兒要講得出做得到。

網絡毒舌好無聊

陳麗麗再次懷孕面對流言蜚語並未停歇。一家三口選擇以積極樂觀的態度「對抗」。黃澤鋒在接受《星島頭條》訪問時展現出超然態度，不避諱地自爆曾受惡毒詛咒：「有啲人好衰好毒㗎，未出世都咒我哋死話『閻羅王都唔要我呀，話我生多個『孫』出嚟送終。』」面對如此刻薄的言語，他直言：「由佢啦，可能佢哋（網民）唔開心，鬧完可能開心啲呢！所以如果冇一個健康心態好難頂，正常人都唔會咁講啦，哈…我哋又唔會肉痛嘅，唔會刺激到我，我做咗幾十年人，呢啲負評濕濕碎啦，而且喺我面前唔會講衰嘢㗎，只會恭喜我。」陳麗麗則採取「唔理」的態度，專注於現實中的溫暖：「每次出街，街坊只會鼓勵我『加油』，感覺到好窩心。」 對於網上諸如「50幾歲都停經啦，仲有得生？」、「仲乜再生？」等質疑，她直斥：「真係好冇聊，咁事實係有得生。」

黃澤鋒、陳麗麗、女兒小黃妃開心迎接新家庭成員。

上月小黃妃當日開心宣布做姐姐。

6年前陳麗麗係52歲高齡孕婦。

黃澤鋒變身湊仔公。

當年陳麗麗52歲懷第一胎，令不少高齡女子重燃希望。

黃澤鋒夫妻追了9年，終於在2019年以52歲高齡陀B女。

兩人在2010年擺結婚酒。

「妃嘗物語」係兩公婆小黃妃成長日記而設的帳號。

陳麗麗超高歲再懷孕惹來負面抨擊。

叮囑發放正能量

黃澤鋒更挺身護妻，並向社會發出充滿溫情的呼籲：「坦白講句呀，小朋友嚟到呢個世界係開心事，諗啲開心啲嘅嘢啦，香港人呢幾年已經係苦㗎喇，畀個希望啦，開唔開心都要咁過生活，開心啲啦香港人，可唔可以有返以前嗰種歡樂呀？」 他坦承收入並非極豐厚，但生活開心就足夠：「其實我唔係搵好多，但生活得開心就OK啦，妃妃日日都同媽媽頂頸係好嘈，但嘈得開心，有兩個小朋友有乜問題？咪湊大佢囉。」 他更以「修哥」胡楓90多歲仍開演唱會為例，展望未來：「我90歲時，妃妃近40歲啦，希望到時我可以抱孫，而且爸爸（指自己）陪同佢40歲都大個女啦，夠啦。」 他回憶道：「60年代我媽媽40生我，一直陪到我55歲。」 對於新增的責任，他充滿幹勁：「我呢個歲數仲有家庭及囡囡好開心，係福氣嚟，唔覺得辛苦，畀啲希望自己啦，開心唔開心都過一日，要開心啲，諗啲好嘅咪過得快快活活囉，應該咁諗嘢。」

幼稚園階段的小黃妃。

小黃妃好叻女。

小黃妃好精靈可愛。

小黃妃K2時，參加學校的運動會。

𡃁模小黃妃表情多多兼古靈精怪。

小黃妃試過因為媽媽的年齡問題而被同學仔取笑媽媽年紀大。

小黃妃安慰媽媽。

陳麗麗此次懷孕並不容易，她強調保持身心健康是關鍵：「我身心都非常好，今次長胎唔長肉，狀況唔錯。」 她坦言，懷孕前已進行醫療評估，結果顯示身體承受得到，子宮狀態亦良好，至於經濟問題，麗麗笑說：「我好快可以拎返MPF（強積金），到時有大把錢，而且都有做定家庭計劃準備，唔係叫人幫我養，唔係天生天養。」兩公婆更幽默表示，婉拒老友鄧兆尊的奶粉贊助，反而笑言最需要尿片及濕紙巾。當被問到會否考慮生第3個時？麗麗即耍手擰頭：「未考慮住，應該唔考慮。」 黃澤鋒則補充道：「任何嘢都係天意要順其自然，不過，有兩個我經已好開心及滿足。」

黃澤鋒（右）曾係TVB藝員。

黃澤鋒入TVB前是香港游泳代表隊成員之一。

2002年鄭伊健、李家聲、黃澤鋒、吳婉芳出席劉家勇新店。