一名年約25歲的小店老闆，近日在網上自爆賣水晶的發跡史，靠著2020年時港府「全民派錢」的1萬元起家，強調做生意不會攞2000元的貨色轉賣過萬元，最多只會賺呢個數。創業故事相當勵志，獲不少網民支持，鼓勵繼續加油。詳情見下圖及下文：
小店老闆自爆賣水晶發跡史 靠全民派1萬元起家逐張睇↓↓↓↓
樓主在社交平台Threads以「創業」為題發帖，以長文講述自己的水晶生意如何發跡：
「唔知道大家仲記唔記得2020年中政府派嗰1萬蚊，當時身無分文嘅我、20歲嘅我，用咗呢1萬蚊決定創業，入咗一批水晶手串賣，賣完一批再入一批，之後仲比我遇到好好嘅水晶批發同工廠。
想俾大家用一個最高性價比嘅價錢買水晶，一直喺屋企做網店，開直播，直至擺完第一次D2市集，嗰時就覺得係時候了，要開一個工作室，2021年1月決定每個月$4600租金150呎，喺觀塘開我第一個門市，做咗4個月，覺得唔得了，需要大啲嘅地方放貨，然後就搬咗去一個400幾呎，每個月萬幾蚊租嘅地方，一直做，做到今時今日，2025年。
大家一定係咪覺得水晶好好做？但現實又係咪咁樣呢？我哋無背景、人脈、資金，由零開始去識人，慢慢同批發打交道，攞貨，攞得唔多，賣又賣得平啲，貼地啲。
其實真係唔係大家理想咁賺得多，起碼唔會攞貨返嚟$2000然後賣你1萬，最多賺你一千幾百，不過講咁多，都係想同大家講，創業其實唔難，守業先係最重要，靠有一班熟客，然後再介紹俾其他朋友，慢慢拓展客源，先做到今日。而家市道明顯轉差，大家消費都謹慎咗，如果係守緊業嘅你，我哋一齊加油，經營小店真係唔容易」。
創業故事獲同路人和應
回應的網民都鼓勵樓主加油，有人指「真心幾Ｘ勁，當年嘅我無咁嘅勇氣去創業，唔敢去闖（屋企負擔），希望你成功越做越順」。另有同路人留言和應「我都係嗰陣開舖，2020年7月俾完二按（按金）一上（上期）同入貨，銀行係無錢嘅，一啲後路都唔留俾自己。本身想主要賣水晶，點知好快就轉做靈氣+魔法，不知不覺間已經第5正職，你提起先知時間過得好快」。
樓主回應時透露更多創業細節：
•係二上一按已經差唔多兩萬，入埋貨真係完全冇錢，我當時都係心諗唔得就重新嚟過。大家都要加油，喺自己條跑道上邊繼續努力，發光發亮。5年真係好快過，而且都好充實。
•我一開始開工作室，即係第一間鋪嘅時候，我係All in（全部）晒落去，入咗10萬蚊左右貨，希望3個月裏面可以回本，因為冇員工，全部都係自己一腳踢，裝修都係自己整，所以呢類型嘅支出唔算好大。
•因為我知道，開得門市，就一定要放最多嘅貨喺度，大家上嚟先有得睇同選擇，所以先All In落去。
•工作上，開鋪開2點至8點，全職開鋪，以前開鋪後開直播會好癲，開到凌晨4、5點都試過。一開始未開門市，開直播試過開到天光。除咗工作都有生活嘅，不過就放棄咗自己最鍾意嘅跳舞，都有少少唔開心的，不過依家行呢條路都無後悔。
另有網民憶起當年收到1萬元時如何使用：
•網民甲：我當時攞咗去買小米；
•網民乙：我嗰1萬蚊用咗來自資出書同買嘢；
•樓主：相信好多人都攞晒嚟買嘢，1萬蚊話多唔多，話少唔少；
•網民乙：係，之後都開咗間網店賣書同玩具。
另有網民提到「因為失業多時，都考慮要不要創業。壓力很大」，樓主留言鼓勵「你問我要唔要創業，我一定支持，但係我都講咗創業容易，守業難，創業都會有好多壓力，所以諗清楚先，我就話當時20歲，可以All in」。
2020年全民派1萬元
2020年時，為鼓勵消費，振興香港經濟，港府公布《財政預算案》時，宣布向每名年滿18歲的香港永久性居民發放1萬元。派錢計畫於當年6月21日起接受申請，經21間與政府簽署協議的銀行網頁或以電子銀行服務登記，最快可於7月8日收錢。
