名媛蔡天鳳前年遭肢解碎屍，事後前夫鄺港智三父子被控謀殺罪。前家姑李瑞香今日則於區域法院否認1項妨礙司法公正罪開審，控方傳召蔡天鳳母親張燕花出庭作供。張燕花交代與鄺家關係「好好」，自2014年已知道鄺港智「偷金嗰單嘢」。前年蔡天鳳失去聯絡當晚，張燕花報案時，鄺港智來電責罵「仆X啦，報警都唔通知我，點解要報警」，張燕花回應「阿女（一向）好有交帶，你全家人都好似唔關心咁『冇事㗎冇事㗎』」。
被告庭上見蔡母作供時落淚
控方傳召蔡天鳳母親張燕花出庭作供，張燕花在庭上辨認被告李瑞香時，被告不禁落淚。張燕花操帶口音廣東話，交代自己生於海南，於內地讀畢中學，1994年來港，同年誕下長女蔡天鳳，蔡天鳳自小在香港接受教育。張燕花憶述蔡天鳳2010年左右認識鄺港智，2年後結婚，先後產下1子1女，一家人同住於黃埔花園。張燕花交代與鄺家關係「好好」，經常見面，鄺蔡2人2017年離婚，子女由蔡天鳳撫養，蔡天鳳其後嫁予譚方駿，家庭經濟環境充裕。蔡天鳳其後斥資購買加多利山Kadooria某單位，供子女居住，2021年入伙，大廳廚房均設有閉路電視，具錄音功能。
鄺港智得知蔡母報警後致電問罪
張燕花續指每天都會聯絡蔡天鳳，前年2月21日下午2時45分最後一次微信通訊，之後蔡天鳳再無回覆。張燕花其後一直有聯絡鄺家，「『你放心啦，成年人喇，會返來嘅，唔使急』⋯⋯成家都講呢啲」。張燕花當晚10時許「覺得好奇怪」，於是聯同蔡夫譚方駿報案，報案途中近午夜，鄺港智來電問及自己去向，張燕花直言「而家報緊警」，鄺港智隨即責罵「仆X啦，報警都唔通知我，點解要報警」，張燕花回應指「你唔覺奇怪咩？阿女（一向）好有交帶，你全家人都好似唔關心咁『冇事㗎冇事㗎』」，遂切斷通話。
被告來電提及綁架稱怕綁匪收不到贖金會撕票
張燕花再致電鄺港傑，對方稱「佢飲醉酒24小時會返來，你做咩咁快報警呀？」被告李瑞香其後亦多次來電稱「人哋要綁架驚收唔到贖金真係會出事會撕票呀⋯⋯你乜嘢都唔可以講，你話你乜嘢都唔知」。
CCTV顯示李瑞香、鄺港智兄弟等經常出入住所
庭上播放多段蔡天鳳住所閉路電視片段，片段中可見鏡頭設於大門後，左邊為飯廳，中間擺放八座大圓桌，上掛有水間吊燈；右邊為客廳，放有梳化、茶几和椅子。控方播放多段日常作息片段，從中可見蔡天鳳子女、鄺港智兄弟、被告李瑞香和家傭經常在住所出入。
被告與蔡母電聯提到與鄺港智少接觸
控方再播放2月23日下午閉路電視片段，片段顯示被告李瑞香坐在梳化上傾電話，期間李瑞香提到被警察查問時「我窒佢呀嘛，查下佢（蔡天鳳）咩時間失蹤，唔係金錢呀，最重要查你個女而家喺邊度，唔係查你個女身邊嘅嘢」，又指「佢問我Alex以前做乜離婚七八年前，佢問呢啲係好多餘嘅問題」。李瑞香稱當時向警方指「『冇喎，（與鄺港智）好少接觸喎』，你明唔明我意思呀？我點答佢Alex啲嘢呀」。
李瑞香其後更指「我唔係識講嘢呀，身有屎即係我即係話畀你聽，你都知道Alex乜嘢事㗎啦」。張燕花今解釋當日與李瑞香多番通電話，問及蔡天鳳下落，李瑞香提到警方曾上門查問，當時李瑞香不理會警方，「叫我唔好管咁多嘢」。
被告：記得警方問你你乜嘢都話唔知喎
錄音中李瑞香續指「Alex⋯⋯佢有事喺身，唔可以講，佢都唔可以講㗎，我都唔可以講㗎」，「我知啲唔知啲，又驚你亂咁講嘢，你記住冇嘢就得㗎喇」，「我哋唔同你呀，我哋要遮掩呀，因為阿細佬呀，你明唔明呀？但你哋唔使遮掩，係啱呀，所以即係而家冇話你錯呀，係只不過我哋唔⋯⋯唔可以好似你咁樣乜都講呀」，「你記得喎，警方問你你乜嘢都話唔知喎⋯⋯你話冇同我個仔聯絡，你可以話冇㗎嘛，係唔係先」。
早年同住已知鄺港智涉「偷金嗰單嘢」被要求「唔好講」
張燕花今說明指2014年時與鄺港智同住，自當時起已經知道鄺港智「偷金嗰單嘢，叫我唔好講⋯⋯唔好畀警察知道」，這些年來一直與鄺港智有聯絡，李瑞香卻要求自己回應警方時答「唔知道，冇聯絡」。其後張燕花在通話中曾話「阿女會唔會出咗事」，錄音顯示李瑞香一度稱「大吉利是！諗呢啲嘢，你係咪傻咗呀⋯⋯你傻傻哋咁大個人諗呢啲嘢，你唔可以講呢啲嘢㗎⋯⋯」
蔡母指鄺曾稱鄺父替其擺平「偷金」事件
張燕花盤問下交代鄺蔡2人讀中學時相識，蔡天鳳16歲懷孕時，鄺港智遷來黃埔花園同住，2人產子後結婚，翌年再誕一女，張當時甚為鍾愛女婿鄺港智，關係甚佳。張燕花自2014年已經知悉鄺港智牽涉「偷金」案，自己更有份錄取口供，得知鄺港智獲法庭保釋，後來再問及此事時，鄺港智稱「佢爸爸幫佢搞掂咗，賠咗錢畀人」。
鄺蔡離婚後兩家人仍常往來惟獨不讓鄺球入住加多利山
後來即使2017年2人離婚，張燕花仍與鄺港智等密切聯繫，每日通訊。張燕花憶述蔡天鳳一對子女開始上學後，每周末都會到張燕花曼克頓山住所留宿，到疫情期間更長住曼克頓山，鄺球鄺港傑亦不時上門一同用膳，然而鄺港智卻因「偷金」案而減少出入。張燕花交代鄺球當時仍居於荃灣尚文苑，因為蔡天鳳「唔畀佢住（加多利山），佢哋全家都知㗎」。
鄺家從未支付蔡一雙子女生活費
盤問期間，張燕花披露「2個孫佢哋屋企（鄺家）1蚊都未畀過」，生活開支從來由張燕花母女承擔，「所有屋企都係我個人畀⋯⋯所有乜嘢都係阿女出，佢哋屋企真係冇使過一蚊錢⋯⋯佢哋冇付出過㗎」。被問到何以願意承擔所有支出時，張燕花回答「咁要睇細路仔、要生活呀嘛，邊個（出錢）都冇所謂」。張燕花談及蔡天鳳後來再生一女時，解釋母女事前曾經商量，「都生咗一個，阿女又鍾意，我哋做父母佢哋過得開心（我哋）都要順住啦」。張燕花坦承經濟負擔漸重，惟「細路仔都冇辦法啦，啲孫嘛」。
蔡母指鄺氏父子曾着蔡天鳳花費七八千萬投資
辯方指出早於2013年鄺蔡2人已經合作做生意，張燕花否認，反指後來鄺港智及鄺球「叫阿女攞錢去投資⋯⋯攞咗七八千萬去注資」。辯方指出鄺港智有份斥資投資，張燕花否認指「完全都冇錢，點會攞錢出來啫」。張燕花另提到多年來經常回鄉探親，鄺家包括鄺港智亦不時隨行。
案件編號：DCCC140/2024
法庭記者：陳子豪
