港鐵將軍澳綫北角站至調景嶺站昨日（22日）傍晚下班繁忙時間，有架空電纜組件移位引致短路跳掣，同時信號系統發生故障，令將軍澳綫全綫癱瘓，大批市民需改乘其他交通工具。
各路人潮昨晚各出奇謀踏上萬里長征歸家路。有把心一橫行了極迂迴路線回家的網民事後盤點行程，指昨午5時51分在北角站，幾經轉折行了一個「大三角」，終於晚上7時40分到埗，歷時近2小時。有自認「地獄黑仔王」的網民回應時，更爆出了車程長達4小時的驚人歸途。詳情見下圖及下文：
港鐵將軍澳綫故障 網民極迂迴歸家路線逐張睇↓↓↓↓
樓主在社交平台Threads以發帖講述昨日的迂迴歷程：
•5:51——收到同事及港鐵訊息，電力問題暫停將軍澳綫，但當刻已在北角站！心諗不如去西灣河站搭車返將軍澳，應該好快！結果上咗西灣河地鐵站附近巴士站，等咗45分鐘，飛走咗3架車。大部份人都等唔到，我亦都係，於是是但上咗架去中環嘅巴士，喺會展站落車。
•6:54——在會展站內都等咗兩班車先上到。
•7:19——到九龍塘站，城巴先至話會加密去將軍澳等巴士嘅班次！諗過喺九龍塘站轉去觀塘，但到咗觀塘一樣冇地鐵返將軍澳！把心一橫直去沙田站！
•7:40——終於喺沙田上到車直返將軍澳 ！有冇人更加迂迴！
回應的網民自認「地獄黑仔王」，爆出更驚人車程長達4小時的路綫：
「你一定唔夠我厲害，本人家住藍田，下午4:30喺科大出發，本來去接人出院，遇正地鐵受阻列車，停咗喺鰂魚涌受困20分鐘，之後鰂魚涌站出返嚟，已經唔使接出院，病人自行出咗，之後想辦法返藍田屋企。
619（巴士）飛咗一架，619有兩架屍殺列車條龍仲係好長，606（巴士）又飛咗一架。等咗45分鐘以上。（的士鰂魚涌去藍田盛惠400港元…唔捨得搭）。
之後上咗116（巴士），遊咗個車河去銅鑼灣、紅磡、黃大仙，最後喺鑽石山落車。之後call uber返屋企，盛惠67.5元，返到去8:30。車程4小時，台灣都飛咗一轉……『地獄黑仔王』」。
石門搭巴士入西貢乘小巴返坑口
另一網民留言「好過你一啲，我6:30喺港大站上車，決定唔好搏搭到北角會恢復正常，喺中環站轉觀塘線。上車一路迫一路諗咗幾個方案，尖沙咀98D（巴士）、旺角98C（巴士）、彩虹102B（小巴），最後決定喺牛頭角站俾10蚊搭A29（因為巴士站近地鐵站）。上咗第3架巴士（可能太塞車，3架車相隔唔到15分鐘），7:45到坑口」。
昨晚有不少網民自述歸家經歷，有另闢蹊徑的網民在facebook群組「將軍澳主場」，講述了另一條西貢行大運路線返將軍澳的路線——「6.15分沙田石門收工，坐299X（巴士）去西貢，再坐101M（小巴）返坑口，7:35到」，這行程獲網民大讚醒目，並建議299X轉792M（巴士）亦得。
港鐵將軍澳綫故障時序
港鐵將軍澳綫昨晚故障期間，沿綫多個車站內人潮如鯽，港鐵安排免費接駁巴士疏導人潮，九巴、城巴及海路交通亦加強服務，歷經近5小時後，列車服務始回復正常。
事發於昨午5時15分，將軍澳綫北角站至油塘站隧道段出現跳掣情況，電力供應受阻，導致該路段服務暫停；其後亦發現將軍澳綫訊號設備受影響，將軍澳綫列車服務需要全綫暫停。
港鐵工程人員即時到達現場進行檢查及緊急維修，將軍澳綫於晚上8時40分恢復由調景嶺站來往寶琳站或康城站的服務，並於晚上10時33分恢復將軍澳綫全綫服務。經初步調查，相信事件涉及該隧道段有架空電纜組件移位，引致短路。
資料來源：laibetty0601＠Threads、Sean Lai＠facebook
相關閱讀：港鐵將軍澳綫故障5月22日傍晚一度全停 歷經5小時全綫逐步復常 政府關注港鐵致歉
相關閱讀：港鐵將軍澳綫故障｜港鐵致歉 指架空電纜組件移位致短路 工程團隊收車將後詳查
相關閱讀：港鐵將軍澳綫故障｜運物局要求港鐵日內交報告 下周一立法會交代
