有港女昨日（19日）在社交平台曝光在台北旅遊，首次墮入偽鈔陷阱，她坦言多次旅遊台灣，「今次真係第一次見！」她公開被騙全過程，提醒網民小心在意。
她最終因為當地人提醒才發現收了偽鈔，當地人亦稱「張錢(偽鈔)好真」「應該係專門呃啲遊客」。
港女台北旅遊墮偽鈔陷阱 曝光過程提醒小心一事：真係第一次見！當地人稱專呃遊客↓↓↓↓
女事主昨日（19日）凌晨在社交平台Threads發帖表示：「大癲第一次喺台灣收假鈔。」她發帖時仍在台北旅遊未回港。
她細述剛剛遇騙的經過，發帖前不久，她到台北著名熱點「饒河街夜市」遊逛，離開準備去西門町，「貪方便喺出邊上咗架的士」。
饒河街夜市外上的士 司機個樣怪怪地
她表示，上車前「睇司機個樣都知佢怪怪地」，但由於該的士排在的士站頭位，她們沒有理由「搭下一架」，於是順理成章上車。
但是，「一上到車去，（車廂內）成地下都係食完嘅垃圾膠袋」，由於去西門町路途不遠，女事主和朋友們決定忍耐一會。
女事主又發現，該的士司機駕駛態度極有問題：「佢由夜市去西門町嗰邊，又衝紅燈又超速。」
黑鼆鼆車廂找贖 $500假鈔夾在$100紙幣中
到達目的地後，她們「諗住快快手落車算啦，就畀咗一張$1000(台幣，約港幣259元)佢找(贖)」，結果司機以多張紙幣找贖，當中夾雜一張500元(台幣，約港幣129元)紙幣偽鈔：「佢就找咗呢一張假鈔我哋，仲夾住喺幾張$100度(台幣，約港幣25.9元)。」
該的士司機找贖時，懷疑故意在漆黑車廂內，將500元偽鈔，夾雜在數張100元紙幣之內遞給女事主，女事主說：「因為當時黑鼆鼆冇留意到。」
西門町店員識破偽鈔：張錢好真，專呃遊客
她們其後在西門町購物付款時，才被店員發現：「佢都話張錢好真，唔睇清楚都唔知，應該係專門呃啲遊客！」
女事主公開該張500元台幣偽鈔的模樣，式樣與真實台幣500元非常相似，但假鈔印有「玩具鈔票」「現具印製廠」字樣及蓋章，如果小心在意，應該可以發現，但女事主在的士接到假鈔時，車廂內卻是「黑鼆鼆」，再加上夾雜在數張紙幣內，因此未有察覺。
網民籲報警 女事主：買教訓當積福算
女事主坦言：「去咗台灣咁多次，今次真係第一次見。」她表示「當係買咗個教訓」，提醒網民「去旅行嗰陣時都睇清楚啲錢，唔好好似我哋咁，因為黑蚊蚊傻更更，冇理到就落咗車」。
有網民呼籲女事主在當地報警，指有關的士司機「肯定係慣犯，可能有紀錄」，但女事主回覆說：「冇記低司機車牌，仲要已經最後一日，當積福算。」
來源：zwoieng.16＠Threads
同場加映：遊台注意！港澳居民入台證取消「必須彩色列印」規定 實施僅個多月又改 台移民署回應咁解釋↓↓↓↓
