58歲黃澤鋒太太陳麗麗，6年曾「超高齡產婦」剖腹誕下精靈健康女兒黃熙恩(小黃妃)，今年佛誕兩公婆於社交平台宣布再做父母，腹中孻女「小黃妃2.0」已5個月大，預產期為今年9月。兩公婆恨追B有無比決心，唔會受任何抨擊影響。陳麗麗更自爆去年底第一次做人工受孕，陀唔穩時要做引產，難忘小產的痛苦經歷：「喺浴缸一日一夜，屙足4公升血！」再做媽媽的勇氣值得佩服！ 採訪：方騫平
從《星島頭條》獨家相所見，「超高齡孕婦」陳麗麗陀住5個月孕肚，精神狀態不錯：「今次陀得好靚，冇水腫，仲長胎唔長肉，𠵱家只係重咗幾磅，體重維持167磅，冇乜唔舒服。」
懂性囡囡安慰父母
對於超高齡再懷孕引起網民熱議，反應兩極演變成「口水戰」！不少網民送上祝福，亦有斥兩公婆「自私」、「貪心」、「逆天而行」，甚至心痛小黃妃自我價值太低，竟將媽媽曾不幸小產責任孭上身。對此，陳麗麗有話要說：「因為初孕階段不宜公開，點知囡囡急不待將秘密跟同學仔分享，所以自責留唔到個B係自己唔乖，今次佢就守口如瓶，我哋冇怪過佢。」她大讚囡囡年紀輕輕卻好懂事，知道父母受到壓力加以安慰：「噚晚佢話『我哋生BB係我哋嘅家事，關啲人乜事呀？佢唔係我哋屋企人！」
唔認同子華神金句
又有不少網友引述電影《破‧地獄》中黃子華的金句作出討論：「我都唔細50幾歲喇，到個仔18歲，70歲㗎喇，我有幾多時間畀佢呀？就當我哋好彩，活到90好唔好？咁即係話佢要用呢世人最黃金、最美麗、最當打嘅年華，去照顧我哋兩個老嘢呀，我哋都冇問過佢想唔想嚟呢個世界，佢一嚟到我哋就掉兩嚿大包袱畀佢，咁對佢公唔公平呢？」陳麗麗卻認為電影要有大反差才吸睛，觀眾先受落，平鋪直敘就冇人睇，故不能作準。她更要強調，屋企有人會幫手照顧幼女，因為兩公婆早有家庭計劃：「我哋唔使眾籌，唔使靠人養，你哋又知我哋冇錢？我嘅年齡好快拎到大筆強積金啦。」黃澤鋒說：「咪由得人哋講夠佢囉，啲人講來講去咪都係6年前嗰啲！」陳麗麗表示同意：「佢哋可以發表意見，但要有口德，唔好咀咒我個女，曾有惡毒留言，當年話祝我生個唐氏綜合症。」
自己施工引產屙血
陳麗麗又分享再次懷孕，為母則強的心路歷程：「其實早喺去年初試過自然懷孕，可惜最終於胎兒12周時心跳停咗救唔返，醫生話年紀大，想要嘅話就要盡快，所以採納醫生建議嘗試人工受孕，去台灣『盡地一煲』，前後試咗兩次才成事，合計花費約20萬港元。」58歲的麗麗坦言人工受孕過程相當難頂：「因為老公見針就驚，每日自己要喺肚皮度拮排卵針；另外對住塊鏡喺pat pat位打咗過百支安胎針…」不過，對比起第1次人工受孕，不幸胎死腹中，要「藥流」排出未發育的胚胎只屬小兒科：「醫生建議我自己塞藥，咁樣對身體會最好。」當日痛苦過程，至今仍歷歷在目：「我費事老公阻住晒，趁住父女唔喺屋企就親自動手，子宮收縮時好痛，踎喺浴缸屙咗一日一夜，屙出大量血塊，失血4公升，流產後惡露排足一周，面青唇白送個女返學，體重急降咗10多磅，呃朋友話唔舒服！」
陳麗麗願為小黃妃夢想成真而「搏老命」：「佢見到身邊啲同學仔陸續做咗哥哥、姐姐，追問我哋多次：『我都想有弟妹照顧！點樣可以有呀？』佢嘅愛成為家中動力。」她認為，只要家人團結一致愛家，心態就會好：「就算當年生小黃妃時，曾因血壓急升突患妊娠毒血症，產後需送入ICU觀察，再生都冇有怕，因為𠵱家Keep住抽血檢查，確保BB健康外，我仲會選擇剖腹生產減低風險。」
