(曾智華)
娛樂圈一如球壇，乃英雄地，人人崇拜的，是最當時得令又狀態巔峰的偶像。所以，這一行最是現實，百分百——不許人間見白頭。
年來聽過N咁多曾栽培出不少巨星的智者，酒後（清醒時唔方便講明）話：「明星，最理想是在最光閃閃時消失，如此才會被永恆懷念。」
中唔中？你話呢？當然中到開巷！
昨日在網台睇到昔日的武打巨星陳惠敏接受訪問，八十歲了，早前患腦癌，在屋企樓下暈倒，還幸發現得早，細胞剛擴散，立即醫，如今醫學科技及藥物不斷進步，正如佢講——執返條命。
不過，年紀大機器壞，跟 是行唔到，因兩腿髖關節已嚴重磨損，再不能支撐身體，於是又要施大手術換金屬骹，所以，目前需要持枴杖走路。
一邊睇，小弟一邊諗起上世紀七十年代的陳惠敏——著名打仔，縱橫尖沙咀，日日開片。真 ，不單止用拳頭，兼出刀幾十人互劈的一種。
「 時，絕對先要打出名堂，才會有老細畀場你睇，百幾二百條 跟我，個個要搵食 ！」打呀打，結果周身傷，左臂更曾被 開。
陳惠敏江湖個「朵」甚響，最威猛時，影圈形容「陳惠敏的拳、李小龍的腿」。佢曾學習西洋拳，有天分，出拳快而重，加上滿是紋身，故在江湖中有不少崇拜者，兼且為人有義氣，也樂於幫人，包括被欺負的藝人。
「八十年代電影雖屬黃金期，但不少賤人老闆搵藝人拍戲，畀完上期就唔找尾期，個別求我出頭。唉，真無良，咁都恰？於是我踩去搵片主講：『你唔找數，我當你欠貴利，一定搞你！』就此，個個投降！」
睇睇老去的陳惠敏，再諗諗李小龍，若果佢在世，已八十四歲，還能打得甚或行得嗎？
