73歲鄭則仕（Kent）在《神耆小子》飾演刻薄專橫富商「錢大海」，他開心跟一班新合作後輩相處愉快，又大讚初次合作的冼靖峰（Archie）很有天份又勤力，給予高度評價。「錢大海」跟子女關係極差，不過Kent哥現實跟一對仔女非常融洽，又慶幸他們沒興趣入行，免得要求人幫手。對於退休，Kent哥強調「仲有能力點解要退休？！」相當有型。採訪：杜杜 攝影：朱偉彥
Kent哥返TVB拍《神耆小子》，大部份對手均是新合作，他相當興奮，「我係殭屍狀態，有段時間冇吸新鮮血就會謝，打回原型變死屍，我打緊柴要吸啲血令自己復活，呢個劇好處係畀咗好多新鮮血我吸，首先係Archie 24歲熱辣辣熱血，先索咗佢先，樊亦敏、曹永廉、蕭正楠都有唔同溫度嘅血，今次合作好開心，佢哋帶我行得好舒服。」
對冼靖峰期望大
Kent哥特別點名讚初次孭重飛的Archie，「有一場4頁紙好硬嘅戲，想拍時唔見咗佢，原來佢練咗兩個幾鐘，佢都知嗰場戲緊要，但一對戲唔對路，出唔到個感覺要調整情緒同對白，佢做唔到，我話唔緊要同導演講不如食咗飯先返嚟拍，佢冇食飯喺度練，食完飯落嚟半個鐘左右，再拍1 take過OK，唔係講笑難度好高，首先佢有天份，好勤力，有天份又勤力，衰極有限。」他更給Archie好高分，「佢所有嘢都好好，75分係對佢評價，或以上就係對佢個人。」他坦認很少讚人，對Archie期望好大，「希望見到佢好，我拍咗咁耐劇，基本上未講過『希望佢好』，除咗《荷里活有個大老千》王子涵，晶哥（王晶）個女有呢種能力，表達得好，我對Archie有好大信心。」
抱孫由仔女作主
戲中Kent哥跟仔女關係極差，現實中跟分別是33歲女兒和27歲兒子的關係就剛相反，「唔可以用非常甜蜜嚟形容，我會用非常融洽。」他跟仔女相處沒秘訣，只得一招身教，「你做啲嘢會感染到佢哋，你講一套做一套，教佢唔好講大話，自己不停喺佢面對講大話踩人，仔女日日聽到，點會聽得入耳，身教好緊要，最基本開始唔係社會教育，係家庭教育。」兩名子女都已婚，長女依洛在科大畢業，跟丈夫定居上海做Marketing，細仔英國大學畢業返港做會計，婚後跟他同住。開明的他認為抱孫由仔女作主，「我生仔我養仔係應該嘅，唔希望我要養孫，問題係佢哋有能力又想，咪做囉！唔好話恨啦，以前舊嘅思想咪會恨，我唔會恨，有會好開心拍爛手掌，冇都開心，因為佢哋知道自己選擇嘅路。」
冇諗過幾時退休
Kent哥長女依洛11歲時，曾跟他在亞視劇《法內情2002》合演父女，初次演戲已表現出色，「坦白講我個女真係有天份，佢客串7日，我完全諗唔到佢好自然講到對白，嗰時佢好有興趣，我一開工佢走去望住個mon幾個鐘。」後來試過其他工作，女兒便轉軚，而兒子從來冇興趣做幕前，令他放下心頭大石，「我個仔喺現場幾分鐘，就即刻標上車話『好熱呀，我唔去嘞！』好囉！兩個都唔想做呢行（鼓掌），恭喜自己，我唔想求人，自己都唔求人，要為仔女去求人，我覺得好冇面。」而且他認為入行都要講資質，「有天份又勤力，喺呢行就有希望，先好踏隻腳入嚟，如果呢兩樣嘢都冇，sorry bye bye啦！」
入行近50年，Kent哥謂會做到死先退休，「我有能力點解要講退休啫？！如果仲有人搵我，觀眾亦都接受我，咪一路生存落去囉！」他更加不想用退休的方向行未來的演藝路，「唔好諗幾時退休，諗有冇能力先，呢行有個特點係好現實，你有能力有價值先至有人叩你門，我喜歡現實，因為會話畀我聽我有冇能力同價值。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
