洪嘉豪《保誠保險呈獻 洪嘉豪 Kaho Live 2024》演唱會昨晚來到尾場，Kaho 經過第一場的經驗，第二場狀態大勇，全晚表現非常精彩，又跳又唱又跟歌迷互動，氣氛是由一開場已經hit爆，當軒公升台出現時，更把全場氣氛推上最高潮，兩人合唱了《青春告別式》 +《 逆時車站》之後互相擁抱， Kaho 向軒公表示，「軒哥，我真係好多謝你，做人嘅嘢，講得出做得到，上次我話我上到紅館我會請返你，我做到啦！」軒公 :「 我從來冇質疑過！」全場即報以熱烈歡呼及掌聲。
軒公向大家表示，由細睇到 Kaho大，剛係台下看著他演出，人生第一次感覺由細見到大的小孩子，真的長大了，「嗰個放咗學嘅波牛，來搵佢媽咪(軒公前經理人)收工，同我一齊食飯嘅佢，今晚已經係男神一樣。今日重同我講話自己好驚好震，但一升台佢就已經Prince Charming 咁啦，係咪？」全場報以熱烈歡呼認同聲音。軒公又話，「唔知幾時開始，去紅館做嘉賓，呢幾年興送禮，今日我都帶咗份禮物嚟，既然你成日話我似你哥哥，做哥哥就梗係要供書教學，所以我幫你安排咗個學位！」此語一出，不單 Kaho嘩然，全場亦跟著嘩嘩聲。軒公繼續道，「喺我人生之中，我覺得最大最大遺憾係我冇好好讀書，讀唔到大學或者一啲我鍾意嘅藝術課程、平面設計呀咁，所以我幫你報讀咗… 呢間學院嘅online課程！全場即報以大笑及掌聲歡呼， 軒公:「我從來冇諗過呢個係笑位….哈哈，呢件係真事嚟㗎！你哋唔好笑，我好認真㗎，呢個課程係有証書㗎！上堂時間係2024年秋天！亦都唔會擔誤到你幕前工作，因為上堂時間係美國時間，香港凌晨！」然後把報讀課程的報名認證文件給Kaho看，又說:「你睇下個銀碼，係咪似八位數字….」Kaho及全場都即時嘩嘩聲，軒公就笑道，「唔係 ，我blur左個報讀價錢啦，我一共同你報咗五個課程，全個證書上堂上到 2025年冬天。你望下我用咗個咩名幫你註冊埋學校個網站？」Kaho望著讀出來 :「 kaho study great great great …」，軒公即時笑道，「你做咩讀晒出嚟，一陣比佢哋炸爆你個email 啦！佢真係好天真㗎！」繼而全場大笑，他再叫 kaho，「你睇下我幫你set咗個咩 password先…. 都係有意嘅….你讀出嚟….」kaho今次學乖了笑道，「我唔讀出嚟啦！password喎…..」軒公「怕咩，password你可以自己再改嘛。」kaho對著軒公笑道:「我依家一講完，就即刻俾人改咗啦，你真係天真呀你！軒哥！」引爆全場笑蛋。
Kaho 及後認真向軒公感謝及承諾，「我會好好讀書，祝我學業進步！」又反問軒公，讀完有冇畢業帽？軒公就話，「呢個課程同真係去大學返學係一樣，甚至讀嘅嘢比去波士頓讀更多，你讀晒嘅頂畢業帽，我送俾你！」全場又即報以熱烈歡呼聲。之後，軒公獨唱了「 隱形遊樂場」才返回觀眾席繼續欣賞kaho的演出。
此外昨晚Kaho與戰車一同升台唱《黑玻璃》，唱到大半，突然情緒失守大哭，而且一直喊足三首歌才識停，歌迷更是貼心，見他喊到唱不到，馬上全場助他大合唱，場面感人。事後他於台上向觀眾解釋，「頭先個哭泣，你哋唔明，我要講下， 其實噚晚第一場，大家睇片可能覺得冇乜嘢，但係我覺得自己做得好差好差， 去到《黑玻璃》之後，我簡直係唔想再唱，唔想再上台， 但係今日我覺得自己唱得好好，點解尋日我會咁，好激氣。 第二，點解我寫咁多歌，《黑玻璃》會咁紅？我唔知咩運氣，令我出到呢首歌又再接紅館演唱會、我想要架車上台，又俾我做到…..我想講今晚《黑玻璃》我想好好哋唱，但係我真係忍唔住….尋晚我返到屋企，我同阿媽講，個個都叫我 enjoy，但係我冇一刻enjoy到！我好失望，成個騷唔知自己做緊乜嘢，我媽同我講，「Enjoy？你返緊工呀！」所以我真係要好多謝我屋企人，我父母，我細佬。」昨晚因為觀眾熱情 Kaho一共encore兩次，為滿足歌迷訴求，他終於唱了《自問自答》和自己改詞惡搞的《 黑司機》，令歌迷興奮萬分最後欲罷不能，又再一次出來跟歌迷一齊大合唱《主角光環》演唱會才結束。
《星島申訴王》已推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
