34歲肥仔（梁業）＠ERROR出新歌《Homework》，久遺的單人專訪，非常Talk得，講新歌以情侶相處由期待變例行公事，更自爆冧女最落力的一次。提到處男Solo《Lady Killa》落足心機，但成績不似預期，心情相當灰，又直指有MIRROR一日都難有出頭天，更以悲哀形容ERROR。對於《造星V》師弟KC & Tsoul將跳舞明星掛口邊，他寄語兩人夠紅就乜都得，「行出街痾屎都有人睇！」採訪：杜杜 攝影：孔子 髮型:Harris Lai@CHIC Private I salon 化妝:Cori Wong@Annie G. Chan Makeup Centre 場地:Studio Nae@studio_nae
肥仔新歌講男女關係，拍拖耐了就會變「交功課mode」，不過他強調並非親身經歷，「我都係聽朋友講咋，唔開得名，哈哈！」肥仔透露阿DEE（何啟華）有份度歌曲主題，然後秒速澄清，「唔係話阿DEE『交功課』呀，頭先講個朋友唔係講緊佢呀！」但為保形象，主題有所修改，「本身向曳嘅方向，講男女夜間活動，但我形象唔可以太曳，『交功課』幾好，冇乜人寫過。」
節日冧女真心難搞
提到何謂「交功課」，肥仔即嚟小劇場示範，「女朋友打電話嚟，可能做緊嘢，或者同friend食緊飯吹水，咦！打嚟喎！『喂BB』哈哈！」不過他再三強調都是聽朋友講，還稱真正挑戰是節日，「電話呢啲係最低壇數，最高壇數一定係生日、情人節、聖誕節嗰啲，要買禮物嘛！當好忙買唔到禮物，或者唔記得買蛋糕，求其買個蛋糕仔，會畀人省到暈低。」問到拍拖以來最靚「功課」，他肯定是第1次，「帶佢去海港城，呃佢話帶佢上郵輪，跟住佢話乜都冇帶喎！其實係帶佢去附近啲餐廳啫！準備晒蛋糕、花、公仔、禮物，最有心機啦！第2次就唔搞咁多嘢！又唔係hea，大家都覺得可以簡單啲，哈哈！」
ERROR團綜保人氣
肥仔又將「交功課」套用到工作上，會視老闆如情人看待，一樣要𠱁，所以他不時會打電話向花姐請安，「間中對佢『交功課』，唔係邊有資源呀？！哈哈！老細要𠱁㗎！」作為藝人，作品就是功課，他自覺做得最好是首個Solo《Lady Killa》，「第1次永遠想做到最好，天馬行空，所有嘢放到最大，budget係最貴，但係最終noise冇咁好，唔成正比。」他稱不是對自己失望，只是失落找不到原因，「作品冇問題，但流量密碼喺邊度呢？嗰時仲特登減肥，跳唱條路係難行，咪慢慢行囉！」他認為人氣絕對影響作品成績，唯有另謀出路，「focus喺ERROR團綜先，節目令我哋有最大迴響同最高人氣，真心ERROR嘅歌冇呢個人氣，我哋就冇人聽㗎嘞，係好悲哀，有MIRROR喺度，我哋就係悲哀嗰個嚟，哈哈！」
望成立跳舞人協會
肥仔出道時開口恨上MAMA舞台，他笑指MAMA近年已不在港舉行，夢想越來越遠，「香港搞先有機會上去，去到日本點上去呀大佬，哈哈！」他坦認好膚淺，覺得有獎才算靚成績表，「組合金獎呢幾年暫時都唔會攞到啦，有MIRROR喺度！」他真心希望可設立跳唱歌手獎，可能會有點贏面，不過他諗清楚就灰心，「分設多個獎項係啱數，咁就有得爭，不過講投票，唉！都係冇得爭。」雖然好灰，但肥仔仍有抱負，「有一日做到古天樂個位，整個跳舞人協會！」
問到KC & Tsuol以跳舞明星方向出道，肥仔覺得路難行，「唔係好多跳舞界衝得出香港，以artist身份衝係咪咁易衝呢？！大眾睇跳舞，同我哋跳舞人睇跳舞好唔同，佢哋要睇到娛樂性，冇得界定點為之勁。」他以網上現況說明，「真正嘅dancer同專拍片嘅dancer流量唔同，永遠commercial流量多啲，冇咁commercial跳啲underground勁嗰啲，又冇咁多人睇，所以好難界定。」他又以入行5年的領悟寄語師弟，「希望佢哋學識一樣嘢，夠紅，掉咩出嚟都有人睇，行出街痾屎都有人睇！」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
