作為許冠傑鐵粉的「泰國通」胡慧冲(Roger)繼日前駕駛仿製幪面超人1號旋風號電單車，風馳電掣到泰國旅遊區拍攝經典歌《最緊要好玩》MV向阿Sam致敬後，前日亦專程返港，真金白銀買飛捧場睇《許冠傑最緊要好玩演唱會2024》尾場。當晚阿Sam在台上除遞咪給他合唱《沉默是金》外，更為他而唱《何日再相逢》，搞到Roger感動得又笑又喊，當天凌晨3點都瞓唔著。
Roger接受《星島頭條》訪問時仍開心到暈，形容好感動：「感覺係一場夢，好夢幻，人生劃上一個完美嘅逗號。睇佢演唱會咁多次，恨咗好多年，冇諗過自己居然有咁機會唱到咁大段歌(《沉默是金》)，正如《浪子心聲》歌詞『命裏有時終須有 命裏無時莫強求』，唱完後激動流淚，旁邊嘅觀眾都戥我開心。」另外，之前Roger接受《健康旦》訪問時提及由細到大都喜歡《何日再相逢》這首歌，可惜阿Sam較少唱，最驚喜阿Sam竟為他唱：「有幾多神級歌星可以咁對自己嘅粉絲呀？所以真係好感動，睇返片段都會喊，再三多謝旦哥（鄭丹瑞）及監製Leslie精心安排，因為佢哋知道我坐邊個位，攝影機就大特寫影住我，全場都睇到我個樣，仲喊得好樣衰…」Roger對阿Sam演出讚不絕口：「現場大多歌我都識唱，全場跟住唱氣氛好好，3個幾鐘頭阿Sam係咁唱，健步如飛冇喘氣，真係好勁呀！」而開前show，Roger獲邀以VIP身份入後台探班，他笑說：「胡慧冲拜見令狐冲，梗係攞令狐冲收藏品畀佢簽啦，因為我太鍾意電影《笑傲江湖》及主題曲，所以將該張唱片封面特製成postcard及tee求簽名。」
Roger又喺社交網開心Share，留言：「今次不是搶咪是阿Sam主動畀咪我唱，而且唔係唱兩句係唱咗一段！今次真係喺紅館開演唱會咁滯，更想不到嘅就係阿Sam竟然找數！專登走到我座位前面為我唱出《何日再相逢》！簡直一字一淚令小弟十分感動，但因為太感動亦流下淚來，全場透過大螢幕見到我個喊樣真肉酸。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
