憑《毒舌大狀》入圍金像獎最佳男配角的謝君豪，今年繼續參與賀歲電影，在陳詠燊（Sunny）執導的《飯戲攻心2》中，飾演搞鬼新角色「魚翅大王六叔」，自稱搞笑底的他一直恨拍喜劇，開心初嘗拍喜劇電影。而Sunny暫無意開拍《飯戲3》，但可能將《飯戲》人物「分拆上巿」，製作個別故事。採訪：杜杜 攝影：孔子 髮型:任柏俊(君豪) 、Lisa C. Makeup Art(Sunny) 化妝:雷淑賢(君豪) 、Lisa C. Makeup Art(Sunny) 服裝:mijosu、New Balance(Sunny)
豪哥飾演張繼聰（陳禮）和陳湛文（陳熹）的「六叔」，Sunny寫劇本時已覺非豪哥莫屬，「『魚翅大王』帶咗好大壓力線畀呢家人，佢做嘅嘢有少少似反派，但人係可愛、心地好，好難拿捏，要演員形象本身好，先會令人覺得壓力線得嚟可愛，豪哥嘅形象加埋演技，我信佢演到先夠膽咁寫，一路寫有畫面。」
演藝師兄弟互讚
接到演「六叔」的邀請，豪哥相當興奮，因除了舞台劇，未試過演喜劇，亦一直想試，跟Sunny傾劇本已好享受，「個女畢業，我去咗英國，我哋視像傾咗好耐，睇劇本覺得好過癮，點樣可以好玩又唔胡鬧？！我唔使專登做啲嘢搞笑，跟個角色好認真咁做咪好笑囉！」去到試造型又令豪哥有驚喜，「我唔知係咁㗎，大佬呀！睇劇本諗係咪要着唐裝㗎？！原來佢畀件咁嘅嘢我着，跟住梳埋咁嘅頭，戴埋咁嘅眼鏡，已經講咗畀你聽點做，演員一着起件衫就知，佢（六叔）唔係等閒之輩，哈哈！」
豪哥跟Sunny是演藝師兄弟，大讚這次初合作勁舒服，因Sunny好歡迎畀意見，「經過傾偈，就會攞到啲好嘢擺落角色，佢唔會關埋道門，好似度身訂造，做起上嚟好舒服，好自由。」Sunny亦讚師兄配合度極高，對後輩完全零架子，「演藝學員心目中，係仰望謝君豪先生，唔係擦鞋，佢演完會同我講『導演你覺得頭先嗰個Level啱唔啱，使唔使收啲定多啲？』真心唔係個個前輩肯攤出嚟同你傾，佢先係最open，合作舒服到不得了。」Sunny又指要遷就海洋公園場地，令豪哥演繹難上加難，「一嚟就拍咗『魚翅大王』最勁嗰幾場，難度好高，但佢好肯一齊試。」聽見師弟不停讚，豪哥風騷笑言：「講到我都心花怒放，《飯戲攻心2之心花怒放》哈哈！」
希望好戲有好報
跟同是演藝師弟的張繼聰和陳湛文再合作，豪哥表示早在2010及2012年跟阿聰合演舞台劇《情話紫釵》，他讚阿聰已獨當一面，「佢個角色好難做，唔係話出嚟就爆嗰啲，佢同修哥（胡楓）講『呢個係Monica』嗰場，個小跑步入嚟好準確，好犀利，好難㗎，呢啲就係功力。」早於舞台劇《南海十三郎》合作過的湛文，豪哥當年已跟他很熟，仲知他筋骨好鬆，「佢真係好似識軟骨功，成日練彈指功打筋斗，係武林高手，佢又係成熟咗好多，歲月催人，哈哈！」
《飯戲》票房超過7000萬，Sunny坦認希望續集有好成績，因背負一班工作人員的心血，「做導演，每刻都孭住百幾人心血向前行，攞到成績係同信任我嘅百幾人一個交代。」對於今年電影票房跟去年相差好遠，Sunny即交個波畀豪哥，「你點睇呀？你嗰套1億（《毒舌大狀》）喎，哈哈！我7000萬之嘛！」豪哥表示很難推測背後原因，但認為好戲自有好報，「拍觀眾想睇嘅嘢，個戲係好，觀眾一定會入嚟睇。」
講到製作《飯戲3》的可能性，Sunny暫未有計劃，但有意創作每個角色的單獨故事，「短期內未必出第3集，但我好鍾意睇Marvel，Universe拆開啲人物，『六叔』有個劇又得，『三佬』同『豬豬』有個劇又得，呢個我唔落閘住。」豪哥都覺得好玩，仲話好想多拍喜劇，「老實講我覺得本人係幾好笑，但拍戲唔同舞台做喜劇，今次係試吓點樣做，睇咗都幾好睇喎，哈哈！而且過程中好享受，最緊要自己開心先，有機會就做多啲，做嗰時唔壓抑，喺現場日日都好開心。」
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
