《中年好聲音2》吸引唔少圈中人及藝人家屬參與其中，昨天第二輪海選都有多位參賽者成為焦點，除52歲艷星亞姐蔡美蘭、鄧兆尊細佬鄧兆榮、孫耀威妹妹Miranda Suen、37歲的ViuTV前主持羅沛琪（Pinky）外，仲有漏網之魚，就係「靚聲王」張偉文經理人方俊。昨日方俊以譚詠麟金曲《愛的根源》出戰，唱得有板有眼，他說：「參賽係希望歌唱事業有更進一步嘅發展，所見參賽加者質素好高，年青及年長嘅演繹方式都唔同，希望從中學習，獲前輩加以提點。」
表現獲肥媽讚賞
張偉文去年坐輪椅開騷，肥媽曾捲入張偉文「慘不忍睹」事件，故方俊一出場肥媽就認得佢，她主動說：「你都好有舞台經驗，我都見過你好多次(演出)。」另一位評判張佳添指方俊熟口熟面，肥媽即認叻補充說：「喺娛樂界你哋冇我咁叻，佢係張偉文經理人，同張偉文開過好多次演唱會啦…你個老師張偉文教得你幾好呀。」肥媽及張佳添異口同聲大讚方俊唱得好，不過肥媽指方俊較為緊張，唱歌時唔望向評判，肥媽再說：「唔可以喺鏡頭前讚你有幾好，不過係好！」評判之一嘅周國豐就透過方俊慰問張偉文，方俊透露張偉文現時身體不錯，只係記性略差。肥媽又再加嘴：「有你睇住佢唔緊要，祝福佢，同我問候佢。」
公開問候張偉文
方俊接受《星島頭條》訪問時，對今次嘅表現覺得OK，但坦言都有少少緊張，但係整體好滿意。他說：「偉文都知道我參賽，佢仲好鼓勵我，話『係時候我一個人行出嚟唱歌喇』故叮囑我一定要參加。」他表示，其實今次參賽無論得失，都會帶來一次好好經驗：「我見到好多參賽者實力都好好，佢哋每一位都有自己獨特嘅優點，令到我喺歌唱技巧上得到更多嘅啟發。」至於網民亦力撐方俊靚仔聲靚，唱得好聽。
「靚聲王」張偉文自2015年開始健康出現問題，飽受腰患、糖尿病困擾做咗兩次腰椎大手術，暴瘦100磅，要坐輪椅代步，不過當方俊知道張偉文有事之後，他義不容辭咁去幫佢，仲承諾會一世照顧張偉文，有情有義。近年張偉文先後兩次確診，更失智嚴重，試過喺老人院撼頭埋牆，唯獨跟方俊拍住上開演唱會令他有所寄託，再展歡顏。
立刻點擊投票👉🏻https://tinyurl.com/38dfzwtv
