36歲的韓國男演員金宣虎前年憑韓劇《海岸村Cha Cha Cha》爆紅，之後慘遭前女友出PO大爆騙婚、逼墮胎，暖男瞬間變渣男，接連被電影、節目、代言切割被迫停工，好彩最後獲韓媒平反，前年尾已復工拍攝首部擔正電影《貴公子》(前名《悲傷熱帶》)，另去年展開亞洲巡迴見面會重整人氣。周四晚(27日)金宣虎從首爾飛抵香港為見面會做準備，近百粉絲聞風到機場守候，一臉笑容的他開心收禮兼頻頻豎起手指公讚好Fans。
昨晚金宣虎在九展Star Hall舉行香港首個粉絲見面會「2023 KIM SEON HO ASIA TOUR IN HONG KONG｜ONE， TWO， THREE. SMILE。」開Show前，主持森美先同觀眾熱身，又抽定稍後玩遊戲的Fans。見面會準時7點開場，金宣虎唱出Paul Kim的《Every Day， Every Moment》冧粉絲，見他不時因甩詞尷尬笑，唱畢他先以廣東話跟Fans打招呼並解釋：「大家好，好掛住你哋，開心見到你哋，頭先掛住望你哋而忘記歌詞，好抱歉。」他又表示，在機場見到香港粉絲，非常熱烈歡迎他，令他感覺就像飛上天一樣。金宣虎自爆去了SOHO區的壁畫街及星光大道遊覽，更說：「呢啲景點比我想像中靚好多，本來想留耐啲，但為了跟大家見面，所以要趕過來。」
唱完歌，森美邀請金宣虎坐低傾偈講近況，金宣虎稱鍾意做運動，特別係散步，但運動唔叻，亦有做重量訓練，但笑言冇咩效果。森美即對他說：「有冇效果要除衫睇過至知！」金宣虎即大笑說：「喺呢度畀大家睇唔係好啱，請大家畀啲時間再等一陣。」他又怕醜表示，在人生首套電影《貴公子》中飾演狙擊者，六月就有得睇。
在「學學廣東話」環節，金宣虎學了三句廣東話，分別是「menu，唔該」、「唔該介紹吓呀」及「唔該，我想要杯水」，隨即學以致用，由森美扮餐廳伙記同金宣虎落單，相當好笑。
到「名場面Talk」環節，邀請了三位女粉絲上台與金宣虎演繹三套他主演的劇集《海岸村Cha Cha Cha》、 《抓住幽靈》和《Start Up》的名場面，分別有碰啤酒、扮嬲撥水及燒肉店冧女，金宣虎親切地跟粉絲握手和派心，又將粉絲的名字放入對白中，更將親手串好的棉花糖送給粉絲。完成演戲環節後，金宣虎說：「剛剛令我想起拍劇的時候，因為粉絲太好演技，能帶我入戲。」
門票最貴1680港元，為令Fans覺得抵睇，見面會好多環節，同Fans演完戲就輪到金宣虎頒獎禮，講吓最想吃的香港食物及想去的香港景點，金宣虎最喜歡吃蛋味濃郁的蛋撻，大讚口感比韓國的更軟滑，豆腐花也非常鍾意.從森美口中得知有山水豆腐花仲好想食添。而最想去的景點已去了，就是𤩹畫街及星光大道。
之後玩突發遊戲，由森美揀幸運兒，有男士一馬當先站起來獲得遊戲機會，金宣虎問他是否被老婆迫才出席？他表示，因為老婆鍾意所以他也鍾意。遊戲是做瑜伽動作鬥耐，金宣虎刻意輸給男觀眾，更對他說：「我為了你美好的婚姻生活…哈哈！，希望你們永遠恩愛。」然後到小組遊戲，除了香港粉絲，更有菲律賓、印尼、泰國及新加坡粉絲上台參與令他相當驚喜，玩畢遊戲金宣虎大呼好攰：「係我玩遊戲以來最辛苦一次。」
最後到金宣虎專屬定制環節，他即場在鴨舌帽上畫圖案，並送給幸運粉絲。見面會尾聲，粉絲回禮剪輯愛心片段，片中以沙畫畫出金宣虎，睇到當事人不停嘩嘩大叫。還有播放各國見面會片段，又有Fans留言，金宣虎已睇到眼泛淚光，至聽到現場齊唱生日歌，提早為下月8日37歲生日的他慶祝，終令他感動到喊，要用紙巾抺眼淚。
唱完最後一首歌，金宣虎眼濕濕講感受：「非常感受到大家的愛，本來係我為你們製造回憶，而家係你哋為我製造回憶，愛你們。不久前拍攝一套電影，就係需要一個治癒嘅心情，多謝你哋畀我，也因為大家我可以帶到好美麗嘅回憶返去，有夾硬被人拉來的老公粉絲，就算硬拉來也多謝你嚟睇我，嚟到香港食咗好多美食本來已覺得很幸福，嚟到見面會，覺得呢刻先最幸福的，多謝你哋！」另他又承諾下次會帶新作品畀大家，又好感激大家一直等佢，更哽咽多謝FANS同佢慶祝生日，臨尾再晒廣東話，「多謝你哋，我哋一定會再見，大家身體健康，我愛你哋，大家小心走嘞。」說畢即忍唔住傻笑。全晚金宣虎多次向FANS鞠躬，又不斷畀手指公讚FANS，又經常被森美講嘅嘢氹到哈哈笑，成晚氣氛超正。
見面會至晚上9點半結束，金宣虎叫觀眾唔好趕住走，因為佢會在出口跟觀眾逐個講拜拜。
《星島頭條》新網站有更多精彩內容：http://www.stheadline.com/
