82歲的盧海鵬(鵬哥)本身患有糖尿病,2018年健康亮起紅燈,其中一條血管阻塞百分之九十,並進行「通波仔」手術,之後盧海鵬更注重身體及養生,不單減少了幕前的演出,而且還跟周潤發跑山,結果令身體狀態比以前更fit,連腳痛問題也有改善!鵬哥身體好轉,當然令身邊的朋友鬆一口氣,相交數十年的林建明(大姐明),日前接受好友鄧英敏的YouTube Channel訪問,原來當年戚美珍有份推動鵬哥做運動,當時與鵬哥拍ViuTV節目《林盧去追星》,鵬哥的精神狀態確實欠佳。
【點擊睇林建明出土靚相】:
大姐明表示當時鵬哥的眼、身體、雙腳和糖尿纏身,整個人變得容易焦躁:「嗰個節目係真人騷,佢之前可能未做過呢類型,冇劇本冇對白,係好生活化,可能佢唔係好適應,於是就唔係好合作,問佢嘢又唔答,講咩又唔睬你,咁我咪改佢做『吳生』囉!」提到兩人的相識經過,大姐明笑稱是拍床上戲:「我第一部電影《社女》,我當時演妓女,佢演其中一個嫖客,我哋喺床上,我前面露少少,其他部位貼住膠布,就咁對住佢,佢講到今日㗎,『黐住晒,乜嘢都睇鬼到呀!』我喺嗰度認識佢,當時佢好後生,又唔係咁肥,都幾靚仔嘅。」到了後期,兩人因為《歡樂今宵》而變成朋友,大姐明對鵬哥的為人讚不絕口:「喺工作上,我真係好欣賞佢、佩服佢,可以話多才多藝,係真係識演技,好有才華,我喺佢身上都學到好多嘢,例如爆人陰毒、整鬼人,呢啲我都學到唔少。」
可惜因為一次意外,改寫了她的命運:「嗰陣有一塊好大嘅佈景版跌咗落嚟,打中咗我個頭,本來休息咗一輪,以為冇事,點知之後再拍另一個節目,成個人都亂晒籠,個腦空白一片,好似變咗另一個人,捱咗好耐先知自己有情緒病。」當時大姐明創立了《心晴行動》,幫助了很多人,到了近年她卸下重擔後,心情如釋重負:「我返咗去大陸尋根,了解多啲自己嘅童年,本來諗住將爸爸同媽媽合葬,點知去到發現原來爸爸竟然同二奶一齊合葬,嗰陣激氣,本來諗住想拆開佢哋,點知風水師叫我唔好搞,咁我就算!」