獨家丨52歲蘭茜自認難搵對象唔強求 淡出20年冇秘嫁富商更加冇離婚

52歲蘭茜淡出幕前20年,近期再度活躍,除去年參與ViuTV劇集《940920》,為曾志偉做《開心無敵獎門人》「替工」主持,兼拍了美髮用品廣告外,更相隔26年返娘家商台開咪,主持881節目《茜選快樂》。其實蘭茜成為「失蹤人口」後,坊間有不少傳聞,指她重返校園,又說她已轉行到古董店打工及成為書法家,甚至已秘嫁富商,但去年已離婚,當事人親自解畫,更多謝大家的祝福。採訪:杜杜 攝影:朱偉彥

蘭茜目前仍在TVB出任曾志偉助理,所以逢周日才主持《茜選快樂》,而她手上的揮春是她的墨寶。
蘭茜目前仍在TVB出任曾志偉助理,所以逢周日才主持《茜選快樂》,而她手上的揮春是她的墨寶。

 

蘭茜在節目的名牌上,加上自己的水墨畫作品,相當有心思。
蘭茜在節目的名牌上,加上自己的水墨畫作品,相當有心思。

 

92年蘭茜在城大修讀英文系,未畢業已加入商台,之後亦效力過新城,但講到最為人熟悉必定是玩TVB的遊戲節目,其不顧形象,唔錫身表現換來不少演出機會。至06年主持TVB《遊戲天王》後便淡出幕前,「我冇站在最前線啫!都有繼續接MC Job,好多謝以前嘅客戶,搵我寫吓嘢,做啲Marketing嘅嘢,當時我好想讀書,做咗10幾年嘢,不停要輸出,覺得自己好多不足,好想再進步,學習多啲嘢,趁唔太老不如去進修吓啦!」

 

蘭茜第一份工便在商台,一做10年,相隔多年重返,感覺依然親切。
蘭茜第一份工便在商台,一做10年,相隔多年重返,感覺依然親切。

 

蘭茜06年主持TVB《遊戲天王》後,便淡出幕前。
蘭茜06年主持TVB《遊戲天王》後,便淡出幕前。

 

讀完2個碩士古董店打工

當時蘭茜沒有公告自己重返校園,因選讀了很難考的中大人類學碩士課程,「讀書呢啲嘢好自身,同埋我唔知畢唔畢到業!哈哈!咁耐冇讀書都會緊張,要交功課,又要去到某個水平先至畢到業,所以我比較低調。」結果重拾書包後,確實令她眼界大開,「之前做節目講埋啲搞笑嘢,返學真正學習點樣去表達自己諗法,呢種和而不同嘅精神好好,每個人都講自己觀點又有唔同睇法,所以嗰兩年學到好多嘢,讀嗰科好着重跟老師去田野考察,睇到好多文化唔同嘅生活,印證返讀嘅理論,係好實在同好豐富嘅旅程。」

曾志偉確珍新冠肺炎後,蘭茜頂替他主持《開心無敵獎門人》。
曾志偉確珍新冠肺炎後,蘭茜頂替他主持《開心無敵獎門人》。

 

之後蘭茜愈讀愈起勁,再到港大修讀輔導碩士課程,期間亦開始在上環的古董店打工,「真係返朝106嗰啲工,荷里活道間舖頭有幾十年歷史,因為我對啲舊物同古董好有興趣,我仲寫信畀個老闆,話想喺呢度工作,佢係美國人,佢好好仲問我『幾時返得工』,我話『聽日啦』,咁就開始做,喺舖頭學咗好多嘢,見咗好多舊物、古董,每件都有佢故事,但做咗接近7年,老闆年紀大要返美國冇再做。」

蘭茜去年參演ViuTV劇集《940920》,飾演簡慕華家姐。
蘭茜去年參演ViuTV劇集《940920》,飾演簡慕華家姐。

 

畫展遇Fans有開咪衝動

雖然不少同學都認得蘭茜,但她好快融入校園生活,「好似一般同學咁,好容易相處,其實我都鍾意玩,同埋我哋好多小組工作,大家要好快好熟,因為要一齊交功課。」離開幕前工作的日子,蘭茜完全沒有開咪及演出癮,「實在太忙,其實交功課好大壓力,唔會諗其他嘢,淨係諗做好份功課,仲要寫畢業論文。」

蘭茜跟Vani和郭靜不時聚會,Vani更為她邀請粉絲出席書畫展。
蘭茜跟Vani和郭靜不時聚會,Vani更為她邀請粉絲出席書畫展。

 

2021年11月蘭茜舉行書畫展,不少圈中好友好似劉曉彤來撐場,亦成為她再開咪的契機。
2021年11月蘭茜舉行書畫展,不少圈中好友好似劉曉彤來撐場,亦成為她再開咪的契機。

 

不過蘭茜有繼續聽電台節目,亦有留意娛樂圈動向,直到前年她舉行個人書畫展,得DJ好友Vani(雲妮)幫助,邀請一班粉絲聽眾捧場,令她即有開咪衝動,「喺畫展同佢哋再相遇,啲感覺即刻返晒嚟,好耐冇見,但唔知點解一講起以前或者節目嘅嘢,大家冇晒隔膜,原來廿年都係一瞬間,見到佢哋做咗爸爸或者媽媽,工作上又挑戰新嘅領域,好感動,就諗會唔會喺空氣中同大家見面呢?!開始有呢個諗法,好多謝商台嘅Director and CEO Rita(陳靜嫻)同佢傾開,佢都話可以嘗試。」節目名為《茜選快樂》,蘭茜就解釋:「去到呢個年紀,人都會有好多嘢唔開心,但係都可以選擇去開心,千祈唔好畀啲嘢困住自己,唔好執着,放開時當你懂得選擇,就係你快樂嘅開始。」

蘭茜在《茜選快樂》中,邀請COLLAR成員做嘉賓,分享成長經歷。
蘭茜在《茜選快樂》中,邀請COLLAR成員做嘉賓,分享成長經歷。

 

由於盧覓雪放假,蘭茜近日到903《在晴朗的一天出發》做替工,仲緊張到前一晚撞傷塊面。
由於盧覓雪放假,蘭茜近日到903《在晴朗的一天出發》做替工,仲緊張到前一晚撞傷塊面。

 

 

自言一把年紀愛情隨緣

蘭茜淡出後有傳已秘嫁富商Johnny Cheung,去年甚至傳出兩人婚姻亮紅燈,她無奈苦笑澄清完全冇結過婚,「大家內心太善良太好,好為我着想,於是乎話『佢應該係嫁咗人』,好多謝大家對我嘅祝福,我會繼續努力,放心!」她更以簡單兩字來形容淡出後的感情生活,「平靜,哈哈!最緊要自我精彩,自我增值及愛自己先係最重要,你有足夠能量嘅愛,先可以令到身邊人幸福。」

自小喜愛書法的蘭茜,近年再跟老師鑽研,更不時舉行書畫展。
自小喜愛書法的蘭茜,近年再跟老師鑽研,更不時舉行書畫展。

 

52歲的蘭茜現階段對愛情只求隨緣,對另一半亦沒特定要求,「你都一把年紀,好難講出特定嘅感覺,最緊要相處到,同大家對好多嘢睇法要一致,尤其是價值觀,到咁上下年紀諗啲嘢唔同以前細個啦!就算同朋友相處都要調節,但係調節係要有底線。」她承認對象難求,但沒有亦冇所謂,「唔會將呢樣嘢擺喺第一個重點,回歸返自己,生命裏面最重要係乜嘢?就係自己覺得幸福同開心,但係你唔係依賴人哋畀你嘛!」

蘭茜以往每次演出,都不顧形象扮鬼扮馬。
蘭茜以往每次演出,都不顧形象扮鬼扮馬。

 

重返幕前的蘭茜,多了一份知性美。
重返幕前的蘭茜,多了一份知性美。

 

新網站 www.stheadline.com 已推出

即時娛樂