剛在美國舉行完四場實體演唱會「BTS PERMISSION TO DANCE ON STAGE – LA」的宇宙天團防彈少年團（BTS），由於回國後要隔離10日未能出席本年度的MAMA。周六（4日）是隊中大哥金碩珍的29歲（韓國年齡30歲）牛一，彈仔生日都會開Live同ARMY（BTS歌迷暱稱）一齊慶祝，Jin都唔例外，更由於蛋糕上的「火蓮花蠟燭」意外引起韓網熱議，更登上熱搜冠軍。
JIN預備咗蛋糕開Live，一點蠟燭，即燃起熊熊大火，然後蠟燭好似仙女散花咁變成一朵會播生日歌嘅火蓮花，壽星覺得好新奇不斷驚呼：「哦哦哦大發」、「新世界，大家睇唔睇到」、「冇諗過世界文明竟然咁發達，大家見唔見到呢個蠟燭仲會唱生日歌？」許完願後吹熄蠟燭，但因為啲火太大又大煙，Jin吹到濁親，再吹多幾次先完事，開始跟Fans傾偈嘅佢發現蠟燭仲係咁播音樂，JIN研究咗一陣都唔知點想熄無奈求助直播粉絲：「有冇人知道點樣熄咗佢？」之後工作人員敲門拎走善後。估唔到，JIN呢場直播引起內地網友熱烈討論，只因火蓮花蠟燭在華人圈存在已久。
除了爆笑火蓮花蠟燭，JIN也在直播中公開「驚喜單曲」《SUPER TUNA》，笑爆透露因跟製作《Abyss》的製作人Bumzu都鍾意釣魚，所以就共同創作咗呢首超可愛又洗腦的單曲，Jin更在美國特別到海邊為《SUPER TUNA》拍咗MV，有景有舞非常認真，輕快旋律及得意舞步瞬間在兒童圈熱爆，好多媽咪級ARMY為仔女拍下兒童版《SUPER TUNA》放上網。
