經常聽見馬圈人、馬評家或資深馬迷呻，當出現難以解釋的賽果及現象時，就會話——跑馬就是這樣的。
乜叫「這樣的」？即是難以或無法解釋。小弟觀馬幾十年（即輸馬幾十年！），當然明白乜叫「這樣的」，但明白不等於接受、認同、處之泰然。
反之，幾乎作出次次針對性挑戰（或發泄）——喂，老友，究竟你有冇專業道德 ？
遠的不講，只講上周日賽事。堂堂香港N屆冠軍騎師莫雷拉騎足十場，當中有七場為頂頭大熱：五隻兩倍、一隻一倍、一隻三倍。即係點？即係公眾倒水咁倒落去。因單從賽績、操練、馬匹狀態及騎師功力 …睇，全部集有利於一身。若以優勝劣敗作為運動的結果，點可能跑到影都冇？
冇可能？就「表演」畀你睇！五隻兩倍馬，由第一至第八場，全部瓜直，四甲不入！
最令人眼冤為騎隻「凌駕」，大家可再睇睇片——同一個人，同一位世界級高手，同一日，雷神騎「凌駕」與騎尾場的「常拼常勇」，由鬥志到博位推騎之狠勁，根根本本是兩個「人」！
難怪有馬評人陰陰嘴笑——劇本寫好如此也！
騎師世界怪現象，還有一單，為前次周日賽大殺三方，一日四捷掃埋「騎師王」的薛恩。哈，威爆之後，離晒大譜，竟連接兩次賽事日，只得一匹坐騎，大坐冷板凳！有冇人可以提供一個解釋去拆解呢個怪誕現象呢？唔准再講——跑馬就是這樣的！
今晚又開波，小弟只以正路提供三匹。
一、第二場「皇寶」。跑一六五○米準到飛起，出六次，一W兩Q兩P，莫雷拉私家馬也，從化試閘輕勝，唔好唔出！
二、第四場「勇創派對」。上次初出已提供，入Q，其實應該W的，慘在衝刺時被撞。此馬鬥心狂勁，腳法兇狠，今晚理應凱旋門見！
三、第六場「人和家興」。跑一千米一次，即入Q。楊明綸操好，試閘又第一，但冇得騎。點解要畀潘頓？你話呢？當然係唔輸得啦！
