86歲的羅蘭近年係咁出席老友喪禮，如李香琴、譚炳文及廖啟智等，每次受訪羅蘭姐表現都相當難過及心痛，但生老病死從來冇得避，好健康嘅羅蘭姐亦活在當下，繼續享受拍劇同拍戲，播映中嘅TVB劇《七公主》佢都有份拍㗎。日前下午，羅蘭姐現身荃灣一酒店嘅日本小市集，冇得去旅行，去市集行吓當去咗啦。採訪:譚壹致
雖然已經86歲，但羅蘭姐仍然活躍演藝界，會拍劇又會出吓活動，中氣十足行路亦好穩。當日佢同幾個中年朋友去咗荃灣某酒店的日本市集，市集有好多嘢賣，有茶葉、有堅果、有零食、有醃製食物、有各式日本飲品，總之全部都放得落口，檔檔都試食嘅話應該都幾飽。
羅蘭姐當日同朋友去到市集先試茶葉，見佢拎咗幾款茶葉慢慢聞，聞完再試飲，飲咗幾杯已經揀到心頭好，之後再試啲日本養生堅果，試完幾款再入手，有茶飲有堅果食，食住等好快就可以去到旅行。雖然戴晒口罩，但戴咗眼鏡嘅羅蘭姐實在太容易認到，好多檔主同客都有同佢打招呼，羅蘭姐亦有點頭回應，羅蘭姐同朋友喺市集逗留近一個鐘，全程表現開心，同朋友又好好傾，表現相當快樂。
