由梁國輝執導，林敏驄、柯煒林（Will）、陳穎欣（Yanny）、盧慧敏（Amy Lo）、陳毅燊（ANSONBEAN)、蘇皓兒（Chloe So）等主演的港產片《觸電》，自9月18日上映以來，口碑持續攀升，成為影壇黑馬。
梁國輝昨晚率編劇Lily、演員林敏驄、柯煒林、ANSONBEAN、羅浩銘等到新城市戲院謝票，繼續造勢。導演指踏入第四周，票房依然「窄窄地」，要再發力。當晚林敏驄率《下流上車族》「家人」現身謝票，抗癌鬥士柯煒林堅持帶病亮相，盡顯專業精神。ANSONBEAN自爆拍攝時發生意外險冇命！
《觸電》自9月18日正式上映以來，贏得觀眾的支持與一致好評，截至10月12日累計票房 $1,809,648。隨著觀眾反應熱烈，院線亦不斷加開場次，成為近期本地影壇的黑馬。 在剛過去的週末，《觸電》台前幕後走訪各大戲院謝票，親身與觀眾接觸，而導演梁國輝昨晚更率領編劇賀鑫（Lily）、演員林敏驄、Will、ANSONBEAN、羅浩銘及吳苑汶等，在沙田新城市廣場戲院同觀眾一同睇戲。編劇Lily說：「我好少出嚟謝票，我其實睇咗8、9次。」在旁的林敏驄說：「有人睇咗36次。」林敏驄隨即詢問面前的觀眾，對方表示已看14次，對《觸電》十分支持。
是日林敏驄就帶埋劇集《下流上車族》「家人」，包括「老婆」江美儀、「細女」蔓蔓羅毓儀及男友林俊其來捧場，又形容是「見家長」。對於未來女婿評價，驄哥笑話：「佢帶個奀挑鬼命嚟，不過，遠睇都ok嘅，（你同佢邊個好啲呀？）你冇嘢呀！佢同我比？哈！都唔同組別，總之蔓蔓話得就得㗎喇。」冧爆的羅毓儀甜笑話：「得得哋啦。」林俊其自言睇完學懂戲中林敏驄的金句「上斜落斜都係斜路，唔碌落去就得啦。」林敏驄問席上江美儀覺得《觸電》是否好看，江美儀說：「絕！大絕呀！做乜唔搵我演？呢套戲真係好睇，希望票房一路上升。阿銘（羅浩銘）的動作編排真係好好。」林敏驄笑言：「佢話自己做得好過伍姑娘。」
ANSONBEAN險釀意外
月前公開患上第四期肺癌的柯煒林精神奕奕現身，在台上有講有笑，行動敏捷，心情大靚。他更分享戲外「小秘密」，Will透露接拍過程已經要排除萬難，因為本來另有工作在身：「我同導演之前已經認識，受到導演邀請拍攝時，導演打電話畀我話有呢部戲，同時佢遇到一啲困難，當時我飛咗去台灣工作，當時與經理人討論，因為有其他工作，時間上未必配合到，經理人話呢部戲劇本係好，建議我去接，好多謝導演同經理人話畀我知套戲係好，最終做到，係一段好美好嘅緣份，多謝大家。」所以他遲遲才入劇組，直至開工第一日才加入，導演笑說，當時即使開了工，但還未落實男主角名單。另外，ANSONBEAN自爆拍攝時差啲死：「因為煞科戲場地太窄，動作指導唔建議我做『大絕』旋轉動作，但我就太衝動冇理會，結果衝向三層高欄干前才急煞停，情況危急，呢個都係一個教訓。」驄哥指佢精力過盛。
