張致恒（Steven）與雯雯婚後育有4子，一家長期深陷財困，幸獲七師傅中秋送暖，宴請大餐、贈玩具及送多封利是。6歲大仔天寶急不及待拆開手上的利是，手持摺疊500蚊紙的他驚叫：「錢呀！」Steven立即喝止兼收起，解釋兒子開始對金錢有概念，場面尷尬！ 採訪：娛樂組
七師傅心繫Steven的4名稚子，知悉其長期缺糧及尿片，特意中秋前夕安排Steven一家人食法國餐，更準備玩具、圖書、利是及各式月餅。難得外出的天寶與天朗見到pizza、雞翼、薯條時，開心到眼睛發光，6歲天寶急不及待拆開手上的利是大叫：「錢呀！」Steven立即教訓兒子要有禮貌；至於雯雯透露患過度活躍的二仔需服藥休息，幼子年紀太小，故未能同行。
稱七師傅係「大恩人」
Steven感激七師傅這位「大恩人」：「好彩有佢成日記住我，不時關心小朋友狀況，追問『夠唔夠奶粉錢？』𠵱家條路開始好返好多。」七師傅表示持續與Steven聯絡：「知佢哋生活苦況，睇住佢哋全家食得好開心，我都好開心。」已轉做電器搬運工的Steven洗心革面，勤力到連黑雨及生病都繼續開工：「我唔怕辛苦，只怕冇飯食冇力搬，試過扭親肩膊，返到屋企貼兩片膏貼繼續開工。做咗1個月意外減到肥，接好多單根本冇時間食嘢，夜返屋企哄完小朋友瞓，就求其腐乳撈飯。」
雯雯秋後算帳數老公
問及雯雯會否心疼其工作辛苦？Steven笑住搶答：「佢每日只會問『幾點收工，快啲返嚟幫手湊仔呀！』不過，明白佢吃力，幾個仔活潑好動，二仔更有過度活躍加自閉症，特別難照顧。大家都辛苦要互相體諒。」此刻一家人食團圓飯期間，「離婚KOL」雯雯當住兒子面前秋後算帳，鬧爆Steven於4年前背妻出軌舊怨，堅稱常萌生離婚念頭：「唔係捱苦問題，係跟住Steven望唔到將來。」她還狠狠瞄向Steven說：「你自己講啦。」Steven尷尬傻笑回應：「好多嘢係累積嘅，加上以前一腳踏5船，佢係受害者，一直好嬲我。佢諗住我會變好，冇諗過件事越來越差，日積月累形成抑壓。」
心結難解的雯雯還力數他4年前在內地工作期間背妻出軌史：「我覺得佢係冇變過，但要傷害都傷害咗，唔代表之後可以彌補。」Steven極力否認：「唔係佢講得咁嚴重，只係傾得埋，真係冇做過任何嘢。此後我已斷絕所有關係同朋友，連酒都戒埋。」雯雯怨憤回應：「太遲喇！」Steven打圓場：「未遲，我一日未死一日都唔遲。」雯雯補充：「都冇咗份愛情，至今都諗住離婚，唔知幾時有實際行動，為咗小朋友仲努力緊。」另外，雯雯又指生完第4個兒子後，因為開刀太多，腹部傷口黏連壓住內臟，搞到大量出血係冇停過，要靠食藥止血，加上家族性心臟病遺傳，產後後遺症太多，所以兩公婆長期分房瞓，感情已轉淡。
盼Boyz仍有機會合體
提到Boyz未能在Kenny個唱合體，有網民留言「沒有張致恒就不是童年回憶」，雖然Steven不覺可惜，但都為自己發聲：「每一個人生都有好多唔同嘅嘢要去應付，Kenny要應付娛樂圈唔同嘅事，我要面對生活，要照顧家庭，就算今次未合體，睇下以後仲有冇機會囉，因為路係一直行落去嘅，我亦希望將來嘅路可以同佢哋一直行落去。」
