昔日以《神鵰俠侶》中「李莫愁」角色紅極一時，現年60歲的雪梨（嚴慧明）近年甚少公開露面。近日她接受心臟「通波仔」手術後復出登台，更首度回應早前引發熱議的「打包剩酒」事件，強調此舉純屬環保美德，否認經濟拮据傳聞。 採訪：方騫平
「最美李莫愁」雪梨最近與「最美黃蓉」魏秋樺在遊船上登台，她接受心臟手術後復出的第三項工作。她透露今年4月因心臟劇痛就醫，檢查發現血管阻塞，緊急在私家醫院進行「通波仔」手術：「當時感覺經歷生死，幸好有買保險，只墊支了11萬元。」術後她需長期服用薄血丸、膽固醇藥等藥物，休養期間體重增加20多磅，但精神狀態明顯好轉：「未通波仔前整個人疲累唔舒服，𠵱家反而變得好精神。」
冇見過姚子羚
稍後穿着旗袍拍攝電影及做影迷見面會，逐步恢復演藝活動的雪梨，正積極減肥。她強調復出並非因經濟壓力，純粹出於對演戲的熱愛：「仔女好獨立唔使我擔心，我工作只係賺錢買花戴而已。」對於年初在澳門宴會上被拍到帶走別桌未飲完的烈酒，雪梨首度開腔澄清：「件事唔係咁！只不過我同普通人冇分別，唔係成日化妝，加上角度問題影得我好似好坎坷。」她直言平日喜歡飲兩杯，打包剩酒只是不想浪費：「環保行為係好事，係一個美德，連家姐米雪都建議我平反，但我覺得冇需要。」
雪梨更自爆最荒謬網傳徐少強兄弟籌咗100萬生活費給她，令她莫名其妙，更透露反而會資助徐少強與已故妻子所生的兩名子女：「始終認識，冇可能睇住兩個10多歲小朋友冇父冇母。」她笑言若能照顧他人，證明自己的經濟狀況尚可。談及感情觀，雪梨表示無意尋找老伴：「好就好，唔好就前世唔收！」強調與過去經歷無關，已全然放下往事。對於41歲兒子徐偉棟與TVB花旦姚子羚的緋聞，她展現開明態度：「仔大仔世界，佢哋想有空間，唔想畀傳媒打擾，但佢冇帶過姚子羚嚟見我。」
