全新正氣劇集《俠醫》將由9月1日起，逢周一至五晚8點半翡翠台播映，劇集以中醫師黃天賜教授的傳奇故事為藍本，帶出滿懷仁義和俠義精神的中藥油公司第二代掌舵人——凌為民（陳豪飾）如何在充滿家族鬥爭、唯利是圖及爾虞我詐計算的世界中，堅守濟世為懷信念，以達到「治病必求治本，救人必先救心」的宗旨。而劇中，負責搞風搞雨的「奸角擔當」，則為丁子朗（丁丁）及劉佩玥（Moon）。
阿Moon在《俠醫》中飾演「機心拜金女」沈綺婷（阿Nat），是羅穎琛（張曦雯飾）同事兼閨密。雖然表面對阿琛照顧周到又體貼，但實質不但經常放阿琛暗箭；為了錢更暗地搶走阿琛不少生意。除了是名副其實的「綠茶婊」，亦為了賺到可觀佣金，不惜出賣肉體，當中最震撼三觀的情節，是先後與鄧力圖（鄭子誠飾）及鄧世鏗（丁子朗飾）發生關係！
談到新劇角色要周旋於不同男人之間，阿Moon搞笑地以「享盡齊人之福」形容自己，並指自己至少與6名男角有親密關係：「有丁丁、馬貫東、陳豪、Patrick Sir、鄭子誠，同埋嘉輝哥。」阿Moon直指角色在演繹時有難度：「首先佢係一個好識得利用人心嘅女仔，對住唔同人，會識得戴唔同嘅面具。而阿Nat變成咁，同佢嘅童年啦同埋成長都有好大嘅關係，一個壞人背後嘅故事，其實都可以好淒慘。」
感激鄭子誠江欣燕教路
至於演開陽光直男的丁丁，這次突然飾演「殺人放火、姦淫擄掠」做齊的超級奸仔，為了個人利益，就連老竇（鄭子誠飾）都冇面畀兼冇情講，丁丁坦言今次這個富二代角色是「壞人之中的壞人」，為了創造新一代奸人經典，丁丁煲勻無綫經典奸角的演出偷師，丁丁稱：「今次可以話係考牌之作，所以我都做足好多功課，希望洗走觀眾之前覺得丁丁係陽光男孩嘅形象，喺演員路上殺出一條新嘅路。」丁丁續指與劇中父母鄭子誠及江欣燕是「反派三人組」：「我哋三個都有唔同嘅奸法，但我係奸得嚟深思熟慮嗰隻。好想多謝兩位前輩，佢哋教識咗我點樣去揣摩見到人哋折墮就開心嘅狀態，呢個係純奸角嘅諗法，都真係幫到我去突破咗個樽口。」
