「Investor Is A Lonely Hunter」，成熟投資者，必定相當孤獨，因拒絕人云亦云，堅守獨立思考。股神巴菲特名言：「別人貪婪時我恐慌，別人恐慌時我貪婪！」，大家不會不明，但幾多個能做得到逆向思維及起而行動？當然，幾時貪婪幾時恐慌，要看不同的客觀環境及針對不同的投資。
業績後急跌 非常無厘頭
例如上周三，國泰航空（293）公布業績，半年多賺1%，但市場反應「奇特」，股價竟挫一成，非常無厘頭。身邊老友紛紛各自解讀原因，我一睇，全部亂噏。事實上，過去兩月國泰股價不斷爬升，市場操作是大型基金吸納迎業績，散戶當然照跟，但基金不會長期死揸唔take profit的，故此一到位及適當timing，就在散戶仍然傻吓傻吓時大型收割。
這種搵食方式，其實不停用在大型藍籌股之上。大家有興趣，可做點功課重溫。剛剛一次就發生在中電（002）之上，不過調整幅度冇國泰咁戲劇性。
好嘞，上周三、四國泰咁跌法，正正合晒我出招，故先研究其業績報告。疫情之後，國泰業務一直向上，無論客運貨運皆可觀，兼且大勢在上升中。上半年收益按年增加接近一成，每股盈利0.567元，派息0.2元，非常健康。
坊間最荒謬評論為：「佢跌，因亂花錢買新飛機嘛，14架要成600幾億港元啊！」簡直冇腦！國泰正正因為生意好，市場需求大，才會買新飛機，此乃百分百好現象！
個人評估最少值12元以上
小弟幾年前疫情時，當國泰宣布4元多批股開始，不斷買入，一邊買一邊睇住佢業績改善，最令人欣喜為有能力全部還清政府借貸，繼而由冇息派變有息派，一切指標皆向好。
個人評估，國泰最少值12元以上，所以上周跌市，正是別人無厘頭恐慌，俾我千載難逢機會再入市加碼。國泰一如中電、港鐵（066）及港交所（388），乃政府政策傾斜股（錫晒佢，一定要掂），傾斜到佢有問題借錢協助渡過難關。
老友，如今重新健康起飛喇。
資深傳媒人 曾智華
