為響應第十五屆全國運動會（「十五運會」）及全國第十二屆殘疾人運動會暨第九屆特殊奧林匹克運動會（「殘特奧會」），商業電台早前舉行一場精彩的前哨戰《沙灘排球 Get Set Play》，邀請多位人氣歌手包括：Ada@VIVA、Elka@Lolly Talk、Val C@VIVA、周殷廷、張馳豪（Aska）、許靖韻（Angela）、黃明德（Dark）、顧定軒（Zeno），以及4位專業運動員蕭昌鴻、楊秀美、林栢均及詹穎琳，音樂與體育界聯手打造夏日熱浪盛事！
像重回中學般熱血
曾是中學排球隊成員的許靖韻（Angela），今次代表881隊轉戰沙灘排球，賽前與隊友進行連串特訓，她指：「喺第一次練波嗰日，可能因為平時在室內打開排球，而且好耐都冇打沙排，嗰晚返到屋企先發現三隻腳趾拗柴，全部瘀晒變成黑色。自從中學之後就冇打過比賽，今次比賽令我諗起以前打校隊同大家一齊練波嘅日子。今日天氣好好，覺得好似返咗中學咁熱血！」
Val C不滿意自己表現
Ada及ValC@VIVA 上年參加《903 AllStar 排球賽》，超水準球技備受網民讚賞，今次分別代表881隊及903隊參加沙排比賽。Ada在第二局連取6分，表現亮麗：「比賽前一個半月，我哋每個禮拜就會練一至兩次波。今日連續開咗6球，冇諗過自己嘅表現都非常唔錯，所以好開心。喺正式沙排賽事，我最期待嘅就係大家好瞓身去救波，因為奮不顧身咁去救起粒波嘅嗰種感覺好熱血，而且場上得兩個人嘅時候，對佢哋默契同配合嘅要求係非常之高。」不過代表903隊的Val C就不滿意自己的表現。而中學時是排球隊成員的Elka@Lolly Talk，今次首次接觸沙排，不過代表903隊的她負責最關鍵性一球，可惜緊張之下發球失誤輸掉第三局，Elka指：「今次球賽最深刻嘅，就係最關鍵性嘅一球由我嚟開，當場緊張感直升一百分。之前冇打過沙排，一直感覺上都以為同排球係同一樣嘢，今次發現原來沙排係困難好多。第一可能係落場嘅人數少啲，第二係喺沙上面速度原來會慢好多，第三係個波嘅重量同普通排球唔一樣，所以對我嚟講都係一種挑戰。」
周殷廷盼再打沙排
同樣是初次接觸沙排的周殷廷，今次代表 903 隊出戰，雖然未能得分，但十分享受沙排比賽，他指：「第一次接觸沙排嘅感覺比我想像中難好多，因為從來都冇乜點玩過，所以喺協調上面係完全仲係適應嘅狀態當中。比賽最深刻嘅一幕，係我用頂頭槌嘅方式去頂返個波轉頭，然後先發覺『咦！我唔係踢緊波』，如果有下次，我一定會再參加。」運動健將Aska中學時期已接觸沙灘排球，今次與 881 隊友Zeno及DJ天欣默契十足，Aska 指：「我好掛住排球，今次有機會同一班 DJ、歌手朋友們一齊打沙排係好開心。平時有做開運動，中學時代亦有打過沙排，所以都發揮得唔錯。今次最深刻係睇到 4 位運動員嘅表演賽，強者對強者，好震撼，佢哋真係好犀利。」
