男食環署外判員工疑因求愛不遂而心生怨恨，涉對女下屬落毒案今（30日）早在西九龍法院續審。庭上播放事主任教會牧師的父親與被告對質時偷錄的對話，指「就算無CCTV錄到你，聖靈都會同我講，你喺到放毒我唔知？你當聖靈流㗎？」。被告哭訴遭事主「呃我感情」故在飯盒落毒，直認「憤怒嘅情緒令我殺錯一千都唔想放過」才在教會撒水銀。終在牧師的開解下，被告與事主互相道歉並原諒彼此。案件7月2日續審。
庭上播放錄音，羅父於去年12月1日晚上，在教會與被告進行小組面談，當中談及被告在教會撒水銀、及在事主飯盒落毒的事宜。羅父向被告稱「教會得幾個人，你出入廁所俾人睇到，有啲地方有迷你鏡頭，所以你放咗水銀係教會雪櫃頂、廁所，我地全部都知，你做咩要放毒係我教會到？如果你謙卑咁講出你嘅犯罪動機，我有可能放你一馬」。
羅父續斥被告「我真係X你嗰肺，放毒係我教會到，我嬲到噴火」，另指「就算無CCTV錄到你，聖靈都會同我講，你喺到放毒我唔知？你當聖靈流㗎？」，並稱「我之前做健身教練㗎，我都有肌肉，肋骨都打斷你」、「爛船都有三分釘，你起碼斷幾條骨，甩幾隻牙走」，形容「我未信耶穌一定砌你」，稱「你係教會放毒，你死梗呀」。
被告回應羅父稱，曾向事主詢問是否有男朋友，獲事主告知沒有，期間「曉諭（事主）收咗我禮物，主動叫我買嘢」，惟其後被告發現事主與他人的親密合照「見到唔係好著衫嘅相，好露骨嘅相」，向事主詢問時則獲告知「嗰男仔係普通朋友」。被告向羅父解釋在教會撒水銀的原因，皆因覺得事主「呃我感情」。羅父則反駁「你掃上帝嗰場，好唔俾面上帝喎」。
被告續訴說「有一次（事主）叫我幫手搬嘢，事後知道原來間屋係俾佢哋（事主及其男友）同居用」，被告直斥「侮辱性好強，我搬傢俬俾佢哋去開房喎」。被告亦指，事主曾要求被告送朱古力，惟其後發現事主問男友「BB，啲朱古力好唔好食」。羅父續問被告落藥的原因時，被告稱「我嬲，想俾嗰教訓佢」。被告另承認曾在事主的飯盒落1至1.5克亞硝酸鈉，稱「我付出咗咁多」才作此極端行為，當日落毒後「我無諗過搞到咁嘅程度，我查曬劑量應該唔會，我嗰日都好驚，驚佢真係瓜咗，嗰一秒已經後悔」。
錄音對話中被告稱「想俾嗰教訓佢」
被告解釋，不知道落藥會令事主暈倒「剩係知會藍色嘴唇，剩係知會令佢身體唔好」，僅「想俾嗰教訓佢」，下藥後「驚自己會坐監，情況係超乎我預期，我覺得可能自己蠢咗」。被告另稱，在事發後曾打算接事主出院及作補償，惟得知事主男友早已接走事主，故在事主出院當晚在教會撒水銀。被告直認「憤怒嘅情緒令我殺錯一千都唔想放過」，指「我知道曉諭（事主）出面有第2個之後」就已購入毒藥。
被告另問「我有無機會再見到曉諭（事主）」，羅父即稱「無呀，耶穌返黎嗰時，你都踏入唔到呢到」。被告向事主哭訴「我由識你第1日，已經好鍾意你，從來無諗過傷害你，我對初戀都做過偏激嘅嘢，當你話想要離開，我唯有祝你幸福」。事主亦回應被告「對唔住，我真係傷咗你嘅心，請你原諒我」。
羅父斥被告「你嘅心態係想攞佢命，係謀殺啊」，並稱「審死官㗎啦，上帝先審判到，上帝願意赦免我哋，就算你逃得過法律，你都要落地獄」。被告解釋「中間係有思想鬥爭過」。而事主亦明言原諒被告。羅父開解被告「呢嗰女仔唔係神為你預備㗎，你逆天而行就必有傷害，有時係錯愛㗎」。在錄音的尾段，被告遭警方拘捕。
辯方反對錄音呈堂質疑內容自願性
羅父在辯方的盤問下稱，被告曾向羅父表露想追求事主，並叫羅父為「岳父」，羅父曾向被告表明，他與事主不合適發展為情侶。羅父庭上明言「佢（被告）竟然單方面諗住同我嗰女（事主）結婚，我覺得好抗拒、厭惡」。辯方質疑羅父在錄音的對話中，曾高聲呼喝被告，羅父同意並回應「希望佢作答真相」。
辯方反對錄音呈堂，質疑錄音內容的自願性，解釋羅父是牧師，是典型有權利之人，在作為神職人員的身份與被告對話。期間羅父曾高聲呼喝被告，並想誘導被告承認所犯之事。被告亦不知對話會被錄音、不知已報案，故有機會侵犯被告的權利。另外，辯方望法庭以酌情權將錄音排除作證據。裁判官余俊翔聽畢陳詞後，終將案件押後至7月2日就特別事項的呈堂性作裁決。
29歲被告叶文飛，報稱無業，否認一項意圖損害而施用毒藥或殘害性或有害物品罪。控罪指，他於2024年11月26日，在旺角欽洲街西87號食物環境衛生署休息室內非法及惡意導致向羅曉諭施用1至1.5克的亞硝酸鈉，意圖使該羅曉諭受損害、精神受創或惱怒。
案件編號：WKCC5337/2024
法庭記者：黃巧兒
