Nvidia（NVDA）行政總裁黃仁勳在股東會上，冇提過任何直接影響股價嘅消息，但昨日半夜股價依然頭也不回，以高位收市，睇嚟今勻真係頭也不回。
該股作為壟斷嘅AI賣鏟人，即使中國GPU收入大受挫，要再度破頂向上都只係時間問題。噚晚股價強勢突破150美元嘅舊年雙頂阻力，仲要企得穩，後市懸念不大。以一隻超過3萬億美元市值嘅股份睇，走勢亦唔會太過複雜，值得投信心一票。
周三晚整體美股表現麻麻，Nvidia股價可謂一枝獨秀，其他逆市升嘅股份，主要係同AI晶片供應鏈有關，可謂一隻股搶盡市場資金。
較大懸念是美股大市本身
至於Nvidia較大嘅懸念，就係美股大市本身。按往績睇，美股4月初先至結束大跌市，通常最快要等4個月先至出現下一輪震盪調整，換言之，按往績計，美股最快8月初先要小心新一輪跌市，況且亦未必咁快會出現。
再者，聯儲局主席鮑威爾最新講到，睇埋6至8月數據，就知有冇條件減息，亦講明目前進展正面，打晒開口牌等於暗示最遲9月好大機會減息，市場喺7月份繼續反映嘅話，大市以至Nvidia繼續升都冇乜走雞，似乎穩穩陣陣坐定定就有錢賺。
晉佳
