本港最新失業率升至3.5%。一名37歲失業5個月的翻譯碩士，近日因為搵工搵到灰而在網上自爆其職業生涯，並呻爆「碩士呢個包袱太重」。細心又熱心的網民卻根據履歷，找到這位失業碩士的問題癥結，紛紛伸援手點出一條生路。詳情見下圖及下文：
失業5個月搵工搵到灰 37歲翻譯碩士呻爆：碩士呢個包袱太重 逐張睇↓↓↓↓
樓主翻譯碩士畢業 失業5個月
樓主今日（26日）凌晨在社交平台Threads以「搵工搵到灰」為題發帖，指：
「本人今年37（歲），翻譯碩士畢業，失業5個月，不斷搵，一直得個in（interview，面試）字，好笑嘅係早排收到offer（錄取通知），過兩日間公司打嚟話因為cut budget（削減預算）而唔請（更好笑嘅係同類事件2019年都遇過一次），而家真係灰到不行。
我知衰，做嘢12年，好多行都做過，翻譯、copywriting（撰稿）、marketing（市場擴廣）、物業管理、飲食、零售、CS（customer service，客戶服務），無份工做得長，最長嗰份年零，唔過probation（試用期）嘅4、5份，而家CV（curriculum vitae，履歷）都係老吹自己一直freelance（自由職業）。適應力低，multitasking（多任務處理）差，中招之後記性都差埋。另一個認衰位係嫌辛苦，雖然鍾意煮嘢食，但飲食真係太辛苦，講到尾碩士呢個包袱都係太重。
我要求唔高，都係搵入行門檻低嘅工，CS、物業管理，fresh grad welcome（歡迎應屆畢業生）嗰啲照apply（申請），開fresh grad價。自問語文好，大專教書同補習都有試。copywriting都有apply，但而家興AI（人功智能），所以唔想再寫字。無專業資格，讀言語治療碩士要50個（50萬元），而且讀完都四張（40歲），太遲啦，其他短course（課程）（例如ERB（Employees Retraining Board，僱員再培訓局）嗰啲）讀完出嚟人工又好低，呢個年紀同學歷要捱實在太難。無晒方向，亦唔係做老細嘅材料，到底我應該點做？」。
相關閱讀：樹仁仔失業半年轉做清潔輕鬆袋14K 怕太留戀「舒適區」
有網民看過樓主的長文後，分析出問題癥結所在：
•份份工做唔長都幾致命；
•呢個世界無懷才不遇，根本就係心態問題，先諗下點解有4、5份唔過probation；
•你呢種態度應該係仲未搵到自己想做乜嘢工，你應該問自己最想做乜好過求其搵一份；
•我想問，有咩工係唔辛苦，能力差係藉口，話自己呢樣唔得嗰樣唔掂，知衰無用，係要去面對，份份工做唔過兩年，幾次唔過 probation，通常唔係能力嘅問題，係工作態度嘅問題。
相關閱讀：月入6萬中年IT男失業 一家之主愁坐食山崩 網民心酸集氣指點生路
網民發長文回應鼓勵樓主
另有網民指，「你語言好其實好羨慕，你打鬼佬工就比我呢啲講句英文都麻麻地嘅人優勝萬倍」，不過也人不太認同這優點，指「語言好，唔代表溝通好，成長背景影喺人際溝通、文化不同就會有代溝」。
有網民認為「這是好一篇令人警惕的文章，多謝sharing（分享）；不少人更是熱心地把耳聞目睹，甚至發長文與樓主分享自身經歷，把事情一碼一碼地鋪開說過明白以鼓勵樓主：
•十幾年前，電台有個聽眾講自己經歷，講自己係博士生。都一直搵唔到工。然後退而求其次用中學學歷搵到份文職，之後老細有份文件要佢搞，搞好咗老細一睇，文件裏嘅雞腸（英文），唔係中學生可以寫得出嘅水平，一叫人入房傾先知佢有博士學歷，然後升佢做經理，師兄，睇你肯唔肯搏一鋪。
•master（碩士）都唔代表乜，以前公司請過一個雙master做admin位，全公司最入門嗰個位仲要12k（$12000）佢都殺，總公司HR（人事部）仲話我哋發啦！我哋心諗咁嘅學歷咁嘅職級佢都殺？……嘩做落就知，佢完全係只係識讀書嗰啲人嚟，教極唔曉，個腦好似日日都係新嘅一樣。血都嘔出嚟。結果試用期要延長，之後過唔到，炒埋。擺低你心中張證書，好好諗下自己可以點增值自己⋯⋯
•我啱啱諗返起之前fresh grad（剛畢業）都係無自信，撞正疫情難搵工，甚至in完聽返熟人講我唔啱，有些少明樓主點解會覺得所有可能性都無嘅窒息感覺。希望你可以振作，我早前都經歷咗一段唔愉快嘅工作經歷，睇埋心理，而家我有返自信，有新工返。試下吸引力法則，心態決定境界！樓主可以利用呢段時間學下新嘢，識多啲人，識人好過識字。
•你本身能力唔得，咪搵啲唔使multitasking嘅簡單工作囉。雖然有AI，但freelance譯嘢都仲存在，只求有嘢做的話，用個學歷搵下補習都會有。我都係翻譯碩士 對我嚟講只係用錢買嘅一個學歷嚟咋喎，無乜特別，亦從來無用呢個學位嚟搵工。唔知你bachelor（學士學位）係讀咩，但建議唔好focus（專注）自己學歷先，諗下點樣改進個人溝通同工作能力罷啦，你乜都嫌，唔會有咩好結果，不如直接退休算。
•問自己鍾意靠技能搵食定係做office（寫字樓）（先唔好考慮自己學歷、以前工作經驗、屋企人看法，自己意願number 1（第一））。唔好話無所謂， 因為係兩條好唔同嘅路。我有位中學同學以前中學會考（舊日嘅DSE，中學文憑試），做咗幾年炒散， 跟住入咗地鐵做物業管理助理，要夜晚拿支電筒周圍巡嗰個級別。佢一邊讀夜校， 一張張Cert（證書）、Diploma（文憑）、Degree（學位），專業資格全部讀曬返來。埋單係總監級（已退休）。幸苦一定幸苦，但係中老年生活好好多，又有嘢可以自豪。
•首先，市道係差，僧多粥少，就算有得面試，10個人可能最終請1個，意味住有9個人會失敗，有時可能10個都唔啱。其次，碩士學歷好普遍，而且要相關／有牌先有用，我就唔熟翻譯行業，但似乎碩士唔係太大幫助，而且有AI真係唔多需要請咁多翻譯，更加少機會請個新人返嚟，有工開都未必收入好。我諗你要放開碩士呢個頭銜，諗下自己想行咩路，讀完言語治療40歲要50個（50萬元）唔係好大問題，有成廿年比你實搵得返，關鍵係你適唔適合，讀完唔做浪費咗時間同50萬先係真正問題。加埋香港地需要勞工，嫌辛苦係好棘手，人地唔嫌棄，你都嫌份工辛苦唔想做。37歲可能仲有廿幾年做嘢，諗清楚自己條路，用幾年時間儲知識同經驗，都仲有起碼廿年比你搵錢，有啲更加65歲都可以繼續做。放低身段係難，但經濟條件差，比你美斯（球王美斯，Lionel Messi）咁叻喺香港都係無咩前途。你有咁嘅學歷，相信都有咁上下認知能力可以做到判斷。加油，係唔容易，37歲諗掂，好過10年後47歲仲煩緊呢樣嘢。
•我同你一樣37（歲），搵工大概搵咗幾個月，都係得個in字，不過我同你相反就係只係做過兩份工，我因為好loyalty（忠誠），所以從未俾人challenge jumpy（質疑轉工頻密），但可能有人又會覺得我唔上進，真係好睇interviewer（面試官）點睇。我覺得問題未必完全喺你身上，而係個大環境真係差，其他人都有講依家job opening（職位空缺）真係少，有時見自己都match（符合） JD（Job Description職位敘述） 80-90%，傾落各方面vibe（氛圍）都好，但就無下文，轉頭見佢又repost（再招聘），我都懷疑好多公司未必真請人，就算真係請都要搵個120% match晒各樣條件嘅人，搵唔到寧願唔請，所以點解我試過見有啲位話懸空咗半年至1年。你依家經濟壓力會唔會好大？如果大我覺得可以做住pt（part time，兼職）再搵ft（full time全職），我依家都係做住pt+freelance搵ft，我就好在自己一支公，生活壓力唔太大，同埋有嘢做住搵工會令自己分散注意力，唔會成日loop（循環）住灰。You are not alone（你不孤單），我好明白你未搵到工嗢種灰，我自己都一樣有懷疑自己係咪真係咁差？但諗返好多同我做過嘢嘅人都對我正評，你唔請我係你損失；我早排因為灰所以暫停搵工一星期，最近沉澱完又重新出發，加油，機會總有一天會出現！
相關閱讀：老婆唔知老公失業兩個月？ 靠舊同事通水驚悉真相 網民明白男人最痛
網民替樓主逃選職業路向
接著，有不少網民認真地替樓主逃選職業路向，建議：
•旅遊顧問，導遊；
•去國內二線城市教英文；
•最穩陣就一早應該去教小學同中學；
•你做私人補習得唔得呀？ 都係一條出路嚟嘅；
•做補習社，或多外國人機構/學校做Admin（行政）；
•物管其實啱你，壓力唔大，寫中英文信你又掂，又唔使multitasking，穩穩陣陣；
•創業，做顧問，拍youtube（網上短片分享平台）講下行內秘聞，好搵；一路煮飯一路講，又係一條出路；
•思前想後，我覺得你應該搵保安去做。放底你嘅學歷包袱，去搵一份適合自己性格嘅工作，咁先係對自己最好；
•試下考政府contract（合約） EA（ executive assistant，行政助理）位。語文好，幫到手。不過都要改善下做事的程序，如果唔係好難做文職；
•我覺得你可以嘗試搵下法庭會請嘅翻譯員或者相關法庭書記、文員嗰啲，我諗你嘅學歷都幾符合，薪水都高同穩定，工作壓力我唔太清楚，但話曬都法律相關所以唔可以hea住做啦。
本港失業率升至3.5%
政府統計處6月17日公布，本港今年3月至5月經季節性調整的失業率為3.5%，較2月至4月微升0.1%；就業不足率也升0.1%至1.4%。期內總就業人數為3,664,700人，較2月至4月減約12,400人；總勞動人口為3,800,500人，較2月至4月減約6,000人。
資料來源：lamlamlam2606＠Threads
相關閱讀：減薪4位數字轉新工 中年打工仔一原因勁感恩 同路人：少5日大假都肯做↓↓↓↓
打工仔為兩餐，人工當然越高越好，但有人卻竟然反其道而行，願意減薪4位數字轉新工；有相似境況的同路人更加自爆，減薪轉工後連大假也少了5天。不過，這兩位打工仔竟不約而同地因為一原因而樂在其中↓↓↓↓
