充滿智慧的已故富豪李兆基，雖然比李嘉誠低調，但有不少金句傳世，例如「貨多市不爽」。簡單用經濟學解釋，就是供應太多價錢必跌，這情況在任何商品市場皆如是。當政府及港交所（388）行政總裁陳翊庭不斷強調，越來越多公司來港申請上市時，我的腦海立即彈出李兆基上述名句，兼心生兩個疑問：大量股份湧上市就等於好？批准上市公司究竟質素如何？
新股湧港質素存疑
年前與一位行內受尊崇的股評人K哥晚飯，兩杯到肚歎息：「香港有2,000幾間上市公司，但當中良莠不齊，正正經經做生意的其實唔多，數量肯定遠比存心搵小股東笨的少。基本上，大部份股票皆冇投資價值，就似一間大型超市，雖然貨多，但充斥質素低劣爛貨，怎樣吸引消費者？」K哥講呢番說話時，香港股市交投低迷，佢一矢中的指出重點。
不過，各人有各人角色，當上市公司數量多寡等於港交所業績時，你係佢負責人會點？當然不再嚴謹把關，隻眼開隻眼閉！
《星島日報》於6月10日刊出標題為《周六福上市申請進入直路》報道，結果上周三（18日）周六福開始招股，新聞一出N咁多老友問：「碌Sir，點睇？你會否申請？」
周六福6年5次申上市
呢間周六福6年內第5次嘗試申請，3度申請A股無功而還，點解？其實，記者應該多點探索此公司被拒4次原因，點解今次又竟突然過關？我會否認購？當然唔會！明明有一間過百年歷史的老字號周大福（1929），點解要去買一間「奇怪公司」呢？
事實上，此公司長期陷入商標侵權糾紛，招股書講明公司營運網絡靠加盟店組成，故總公司能控制有限，並可能會涉及知識產權侵權索賠，因而必須負擔高昂的法律辯護費用。
呢間公司招股時早早預先保護自己，帶晒頭盔兼行騎樓底。各位，新股市場熾熱，唔等於你都應該「熾熱」㗎，投資是智慧選擇，以求增加財富。若對上市公司營運理念及管理層心術一嚿雲，係咪應該縮一縮，切勿做「清兵」呢？
資深傳媒人 曾智華
