過去幾年，行行專業人才大流失，政府牙醫當然不例外。Covid乜都停頓，當然冇得洗牙（公務員），而Covid過後，因唔夠醫生，也仍是「百冇」，終於決定外判牙科服務。
外判，當然邊個平邊個做啦（否則必被投訴到廉政公署），結果小弟去年就試 一次令人怕怕的外判洗牙。
醫務所在紅磡，雖然早有心理準備，香港處處寸金尺土，但個集團都唔使孤寒成咁 嘛，接待處四呎乘六呎，另外三間診室——也是間間四、五呎乘六呎。病人同醫生距離非常親密，如此環境，有質素、有經驗的醫生點會做呀？
我 低後，戴住口罩、身高四呎半的「小妹妹醫生」負責洗牙，雖未至手騰腳震，但用「生手」形容都冇乜錯，肯定是剛剛畢業學生。求求其其洗完，我出接待處睇睇佢張卡片，原來並非「土炮」，而是中山大學牙科畢業。可能我有偏見，總之就是覺得佢技術麻麻，若讀香港大學，咁表現，都唔知畢唔畢到業。
轉眼一年，感謝上天，原來過去一年有六十個醫生重新加入政府牙科，對市民及公務員服務漸漸回復正常化。前天回歸政府診所洗牙，地方又大又闊，窗明几淨，人流控制得宜，真是超級舒服。
檢查牙齒時，醫生話：「曾先生，你牙肉有少少發炎，下星期要來作深度再洗一次，到時會用麻醉藥。」
咪話我多心，小弟素來冇試過發炎，究竟今次領 ，同上次洗得唔夠好有冇關呢？
不過，有冇關都好，我已決定不接受政府的外判洗牙服務，寧願自己花一千幾百元幫襯私家醫生。講到底，健康重要過一切，反正一年一次 。
唉 下周又要上「電椅」，次次都似時間停頓，諗起都冇晒癮。
