天后鄭秀文（Sammi)第五場「You & Mi鄭秀文澳門演唱會2025」，她以一身性感紅色蕾絲造型與特別嘉賓王丹妮合唱梅艷芳經典作品《壞女孩》。
昨晚Sammi換了新裝，以黑色燕尾西裝 、配襯Headpiece演唱《哭泣遊戲》、《上一次流淚》和《如何掉眼淚》等「眼淚三部曲」，非常有型。然後工作人員上台替她除去西裝，展示BRIELLE紅色蕾絲連身衣，完美身材表覽無遺，全場尖叫，她風騷向四面台觀眾擺甫士，大派福利。
Sammi一身赤紅衣服配合
「大家都知我每晚邀請嘅特別嘉賓風格都好唔一樣，有新人亦有喺樂壇比較耐嘅，仲會令大家意想不到。今晚呢位都有少少意想不到，我都幾興奮，同埋今晚揀呢首合唱嘅歌都令我好興奮，專登著咗呢一身赤紅衣服配合。」Sammi說。音樂前奏響起，原來是樂壇大師姐梅艷芳的名曲《壞女孩》，特別嘉賓王丹妮（Louise )升上舞台，全場掌聲。她們又唱又跳，Louise更將其中一句歌詞改成「Sammi 太漂亮」，氹得Sammi笑逐顏開。
Louise非常感恩前輩Sammi的不時提拔，難掩興奮表示：「雖然電影中試過在舞台上唱歌，但今次是以個人身分踏上舞台同Sammi合唱，心情無比興奮，因為我自己同埋屋企人都係Sammi嘅fans，所以受到Sammi邀請真係好surprise、好榮幸！今次《壞女孩》呢首歌係Sammi親自揀嘅，能夠同Sammi一齊唱梅姐嘅歌我覺得特別有意義，亦能深深感受到我哋對梅姐嘅敬愛之情！」向來工作認真的Louise，事前專誠找唱歌老師練歌，更在台上獨唱了Sammi的《理想對象》，坦言：「呢首歌係我親自揀嘅，因為除咗我之外，我知道好多歌迷都視Sammi為理想對象，所以我唱出大家嘅心聲。」
Louise獲老公、囡囡同行支持
此外，Louise最難忘Sammi百忙中抽空與她排練：「Sammi已經夠忙，但仲願意抽時間跟我一齊多次rehearsal，務求令到表演嘅時候更合拍，更有feel。作為後輩的我，真係覺得Sammi非常勤力，對於表演亦追求盡善盡美，仲非常提攜後輩，俾我哋有多啲表演經驗。呢種精神真係好值得學習，respect！希望除咗舞台表演外，將來可以有機會跟Sammi一齊拍電影！」Sammi則在後台大讚Louise表現淡定且很有台型，獲得讚許的Louise開心不已，更透露此行老公、囡囡，還有專程由澳洲回來的老爺奶奶都有同行，因為全家都是Sammi的忠實fans。
唱畢二人擁抱，Louise興奮向Sammi介紹身上的衣服：「你睇吓我身上好多個M字，代表我對你嘅愛。」Sammi笑說：「係喎，好有心思，但差個『i 』字，我唔係叫『阿M』我叫『阿Mi』，我一嚟到即係『M到』！」Sammi感謝Louise百忙中抽空擔任其表演嘉賓，說：「多謝你一口答應嚟做我嘉賓，仲為咗今日演唱，特登為唱呢首歌上堂，好有誠意！」全場掌聲。Sammi笑言要落台換衫和吃東西，問Louise留步唱甚麼歌？她說：「Sammi係我同埋所歌迷心目中《理想對象》！」
演唱會尾聲，Sammi走近觀眾席唱歌和收禮物，其中一位來自西安的女歌迷特別熱情，吸引了Sammi注目，她表示今次澳門演唱會舉行八場，她買了六場門票，又高呼「我已經愛了你27年」和「我想同你唱歌」。Sammi表示安全理由不能請她上台 ，然後將咪高峯遞給她。由於女歌迷一直用普通話示愛，直到《終身美麗》音樂響起，她以純正廣東話唱出，Sammi感動得雙手掩面熱淚盈眶，做口形跟她隔空「合唱」，全場拍掌打氣。Sammi第五場澳門演唱會，在這溫馨氣氛下順利完成。
